Akyat-bahay namat-an kulatado
CEBU, Philippines - Nagtingkagol sa bilanggoan ang 19- anyos nga lalaki nga gikatahapang sakop sa akyat-bahay gang nga nadakpan sa tag-iya sa panimalay nga iyang gisaka alas 2 pasado ang takna kagahapon sa kadlawon sa Sacris, Tipolo, Dakbayan sa Mandaue.
Si SPO1 Michael Limalima niila sa nadakpan nga si John Rey Alinsug, taga Lower Malibu, Tipolo, kinsa nadakpan ni Ryan Dave Delima, 28-anyos, kinsa nakamata sa pagsaka sa suspek sa panimalay niini.
Matud ni Limalima nga nakasulod ang suspek sa panimalay pinaagi sa pagguba sa bintana nga bildo ug gikuha ang duha ka mahalon nga cellphone ug sun glasses nga P10, 000 ang kantidad.
Ang biktima nahigmata sa mga kasikas nga maoy nakaaghat kaniya sa pagbangon ug gipasiga ang suga.
Ang suspek nga nakalitan sa pagsiga sa suga nidagan paingon sa gawas ug nilayat sa bintana apan dali kining nagunitan sa biktima dungan ang pagsinggit sa pagpangayo’g panabang sa mga silingan.
Ang mga silingan nga naalarma dali nga nihugop ug naabtan ang suspek nga gidumog pa sa biktima ug gipauwanan sa daghang kumo sa mga silingan.
Ang dinakpan pasakaan og kaso karong Lunes. (BANAT NEWS)
- Latest
