Alcover gustong ma-tsirman sa agrikultura

CEBU, Philippines - Nagtinguha si Councilor-elect Pastor Alcover Jr. nga makaangkon sa chairmanship sa committee on agriculture aron iyang matutukan ang industriya sa mangga ug buwak sa bukirang bahin sa Dakbayan sa Sugbo.

Buot masusi ni Alcover nganong ningminus ang produksiyon sa mangga ug buwak aron matabangan ang mga mag-uuma.

“Cebu is famous sa sweetest mango, karon wa na, di na positive ang production, ngano man? We have to investigate,” matud ni Alcover sa niaging 888 News Forum sa Marco Polo Plaza.

Nakita usab ni Alcover ang kuwang na ang supply sa buwak sa Sirao nga giilang flower destination.  Matud ni Alcover nga importante kaayo ang industriya sa mangga ug buwak sa dakbayan.

Kung mapalambo ang panginabuhian sa mga mag-uuma, sumala pa ni Alcover nga mapatunhay usab ang kalinaw ug kahusay sa bukirang bahin sa dakbayan.

Giklaro usab ni Alcover nga wala niya biyai ang iyang kawsa batok sa komunismo sanglit tibuok pa ang iyang grupo sa Alliance for Nationalism and Democracy lukop nasud.

Matud niya nga karon nga gipili siyang konsehal sa dakbayan, ang agrikultura ang iyang tutukan. (BANAT NEWS)