Mga namaligya og refilled butane gironda
CEBU, Philippines - Sakop sa Department of Energy ug Bureau of Fire Protection nilusad og operasyon ug gipangsakmit ang mga gipamaligyang refilled butane gas canisters sa duha ka tindahan sa Samboan sa nilabay’ng adlaw.
Si Police Officer 2 Joseph Belangoy, imbestigador sa Samboan Police Station nga nakahinabi sa Banat News nagkanayon nga ang DOE-7 pinangunahan ni Atty. Russ Gamallo ug Bureau of Fire Protection nga gipangunahan nila ni Fire Officer 1 Mark Lee Samson ug Fire Officer 1 Hatch Blaise Vergara milusad sa maong operasyon.
Matud ni Belangoy nga duha ka tindahan ang naembargohan tungod sa kalapasan sa Presidential Decree No. 1865 Batas Pambansa Blg. 33 o ang pagpamaligya og mga produktong petrolyo nga walay lisensya.
Nakuha ang 64 ka canisters sa butane ug 80 ka walay sulod nga lata gikan sa duha ka tindahan.
Nakadawat og report ang maong mga ahensiya bahin sa maong peligroso kaayong baligya nga refilled butane sa lata ug sa pagsusi, wala diay mga lisensya ang duha ka tindahan nga makabaligya niini.
Dugang ni Belangoy nga padayon pa karon ang operasyon sa duha ka departamento aron mangembargo sa maong mga ginadiling produkto. (BANAT NEWS)
- Latest
