Luna sa Kapitolyo gidonar alang sa DOJ offices
CEBU, Philippines - Nidonar ang Kapitolyo og 3,000 metro kwadrado nga luna sa kanhi DA compound ngadto sa Department of Justice alang sa ilang mga buhatan. Plano sa DOJ nga itukod sa maong luna ang Regional State Prosecutor’s Office, Provincial Prosecutor’s Office, Cebu City Prosecutor’s Office ug Public Attorney’s Office.
Atol sa pagpirmahay sa deed of donation kagahapon, gihangyo ni Gobernador Hilario Davide III si Justice Secretary Emmanuel Caparas nga itugyan sa Kapitolyo ang karaang Palace of Justice aron mapaayo human naguba sa linog.
Apan si Caparas niingon nga kinahanglan pa niya ipadangat ngadto sa mga huwes ang hangyo ni Davide. Samtang ang kahuot sa mga prisohan maoy usa sa mga problema sa Bureau of Jail Management and Penology gumikan sa hinay nga pag-irog sa mga kaso.
Si Caparas niingon nga gihatagan na nila og pagtagad ang maong problema ug gani ubay-ubay na ang mga piniriso nga nakagawas human nasuta nga nakaserbisyo na sa ilang sentensiya.
Giangkon ni Caparas nga kuwang ang mga prosecutors ug gani sa nilabay’ng duha ka buwan nitudlo sila og sobra sa 350 ka prosecutors apan giingong kuwang pa gihapon.
Ang kakuwang sa mga huwes ang gilantaw na usab sa Korte Suprema.
Sa laing bahin, giklaro ni Caparas nga wala hingpit nawagtang ang death penalty sa nasud nga gitinguha ni presumptive president Rodrigo Duterte nga ibalik.
Matud ni Caparas nga kung gustong ipatuman pagbalik ang death penalty, tukion kini pagbalik sa Kongreso. Si Davide nipadayag usab sa iyang pagsupak sa death penalty.
Apan kabahin sa “shoot to kill order” matud sa gobernador nga magdepende kini sa sitwasyon sama kung ang usa ka kriminal mosukol ug kinahanglan usab nga depensahan sa polis ang iyang kaugalingon. (BANAT NEWS)
- Latest
