Gironda samtang nagtan-aw og X
CEBU, Philippines - Kapin sa P200 mil nga kantidad sa shabu ang nasakmit sa kapolisan gikan sa duha nga nadakpan atol sa pagpangronda sa Barangay Kamputhaw, Dakbayan sa Sugbo pasado alas 12 kagahapon sa udto.
Ang duha giila nga sila si Rene Reataza, 46, alyas Bongbong, duha ka adlaw pa lang nga biyudo ug Ma. Ludy Labrado, 42, alyas Ging-Ging.
Ang operasyon gipasiugdahan sa Regional Anti-Illegal Drugs Special Operations Task Group-7 kauban ang mga sakop sa City Anti-Illegal Drugs Special Operations Task Group (CAIDSOTG).
Gamit ang P200 nga buy-bust money nakapalit og usa ka gamay nga pakete sa gituohang shabu ang asset sa kapolisan gikan ni Reataza hinungdan nga kini gironda.
Matud ni Senior Insp. Joey Bicoy, team leader sa RAIDSOTG-7, nga usa ka level 2 drug pusher si Reataza diin ang iyang supply sa drugas naggikan ra usab sa siyudad.
Atol sa pagronda tayming usab nga ilang naaktuhan ang duha sulod sa lawak nga nagtan-aw og X-rated nga salida. Si Labrado nagkanayon nga naabot siya sa maong dapit kay igo ra kini nibisita kay amiga sila sa asawa ni Reataza.
Apan lakip nga gisikop si Labrado human nasayran sa kapolisan nga apil kini sa ilegal nga kalihukan.
Hinuon aminado si Reataza sa iyang pagpamaligya og drugas aron makasapi alang sa pagpalit og tambal sa iyang sakit. Narekober sa mga polis ang 22 gramos nga shabu nga kantidad og P259,600.
Samtang nadakpan sa buy-bust operation ang pusher sa Bas, San Vicente, Liloan alas 5 pasado sa hapon sa niaging adlaw.
Ang nadakpan mao si Restituto Lutao, 36, taga Tilaong, Consolacion, kinsa nasakmitan og 39 ka gagmay nga pakete sa shabu uban sa drug paraphernalia. (BANAT NEWS)
- Latest
