Duha ka drug pushers nadakpan

CEBU, Philippines - Mokabat sa kapin P100 mil nga kantidad sa gituohang shabu ang nasakmit sa mga sakop sa Argao Police gikan sa gipasanginlan nilang idlas nga drug pusher sa Brgy. Jomgao kagahapon sa buntag.

Ang dinakpan giila nga si Cirilo Camilo, 44, nagpuyo sa maong dapit. Matud pa ni Sr. Insp. William Homoc, hepe sa Argao Police nga nahinabi sa Banat News dugay na nila nga gipangita si Camilo  kay duna kini pending nga warrant of arrest sa kaso sa paghupot og ilegal nga armas.

Gawas sa iyang giatubang nga kaso nasayran usab sa kapulisan nga nalambigit kini sa negosyo sa ilegal nga drugas ug gihulagway nga usa ka level 3 drug pusher.

Bitbit ang warrant of arrest nga giisyu ni RTC Judge Maximo Perez, gironda sa mga polis ang gipuy-an sa suspetsado hinungdan sa pagkasikop kaniya ug ang 16-anyos nga lalaki nga giingong iyang suholan sa negosyo niya sa drugas ang naluwas.

Narekober sa mga polis ang usa ka canister gikan sa suspetsado nga adunay sulod nga mga pakete sa shabu nga makantidad og P121 mil.

Samtang nadakpan ang usa ka Mark Comendador, 33, sa kapolisan sa Presinto 3 sa Mandaue City Police Office diha sa Zone Okra, Brgy.  Paknaan, Dakbayan sa Mandaue sa miaging gabii.

Si Senior Police Officer 3 Gregorio Cabizare  miingon nga gidakop ang suspek human kini mibaligya og usa ka paketeng shabu bugti sa P200 nga marked money  ngadto sa polis nga nagpakaaron-ingnong drug user. (BANAT NEWS)