P300 mil shabu, armas nasakmit
CEBU, Philippines - Kapin sa P300 mil nga kantidad sa gituohang shabu ug armas ang nasakmit sa kapolisan sa managlahing operasyon sa kapolisan sa probinsya sa Sugbo.
Ang mga sakop sa Provincial Intelligence Branch sa Cebu Provincial Police Office misikop sa 33 anyos nga babaye atol sa buy-bust operation diha sa Brgy. Kadaruhan, Lungsod sa Borbon pasado alas-6 kagahapon sa sayo sa buntag.
Ang dinakpan naila nga si Evangeline Hortezuela, alyas Jingkoy, nga nagpuyo sa maong dapit, nasikop usab ang usa ka Dexter Montejo, 34, human nakuhaan og lima ka paketeng gituohang shabu.
Si Senior Inspector Armando Labora nga nahinabi sa Banat News miingon usa ka level 3 drug pusher si Hortezuela kinsa giingong maoy nipuli sa bana niini nga nadakpan na tungod gihapon sa pagpamaligya og drugas. Sulod sa gipuy-an sa suspetsado narekober sa mga polis ang lima ka dagkung putos, 27 ka medium size nga gituohang shabu nga mitimbang og 25.56 gramos nga mikantidad og P301, 608.
Sa laing operasyon, tulo ang nadakpan sa kapolisan sa Dakbayan sa Mandaue atol sa buy- bust operation nga gihimo sa Barangay Jagobiao.
Si Police Officer 3 Glenn Sollano sa Presinto 3 sa Mandaue City Police Office (MCPO) miila sa mga dinakpan nga mao sila si Gery Palagnas, 33, Felicisimo Zapanta, 32, ug Ricky Pedrosa, 39, pulos nagpuyo sa maong dapit.
Si Palagnas ray tuyo sa mga polis tungod sa mga taho labot sa pagpamaligya niini og shabu sa maong lugar apan naatlan usab sila si Zapanta ug Pedrosa sa lugar ug nasakmitan og drug paraphernalia.
Nakuha usab gikan kang Palagnas ang 26 ka gagmay nga paketeng shabu ug kalibre .45. (BANAT NEWS)
- Latest
