Gituohang niundang na nga pusher nasikop

CEBU, Philippines - Halos tunga sa milyon ka pesos nga kantidad sa shabu ang nasakmit sa mga sakop sa San Nicolas Police Station gikan sa usa ka 34-anyos nga lalaki nga naaktohan sa iyang transaksiyon sa Sitio Mahayahay, Calamba, Dakbayan sa Sugbo pasado alas 11 sa nakalabay nga gabii.

Ang dinakpan naila nga si Janus Rosaceña, nagpuyo sa maong dapit.

Matud ni Senior Insp. Chuck Barandog, hepe sa San Nicolas Police Station, nga samtang naghimo sila sa pagpatrolya ilang nakita si Rosaceña nga aduna’y kaestorya.

Dihang nakabantay nga aduna’y polis dali nga naglumbaanay og dagan ang mga suspek apan nahawiran sa mga polis si Rosaceña.

Nakuha gikan sa dinakpan ang tulo ka pakete sa shabu apan sa pagsubay sa mga polis sa dala niini nga belt bag mas daghan pa nga gituohang drugas ang nakuha.

Niabot sa 263 ka pakete sa gituohang shabu ang narekober sa mga polis nga mokantidad og P450,000.

Si Barandog niingon nga anaa kaniadto sa ila’ng lista si Rosaceña apan human nadakpan, nakagawas kini ug nahilom ug nagtuo ang mga polis nga niundang na sa ilegal nga kalihukan.

Samtang nabalhug sa detention cell sa Presinto 3 sa Mandaue  City Police Office ang duha ka motorista nga nadakpan sa checkpoint ug nasakmitan og shabu ug kalibre .45 alas 2 pasado sa niaging kaadlawon sa Barangay Jagobiao.

Si Police Officer 3 Wendel Belandres niila sa nadakpan nga sila si Andrew Pugoy, 18, ug John Ryan Omagos, 25, pulos taga Lungsod sa Consolacion.

Wala magsul-ob og helmet ang duha hinungdan nga gipahunong kini sa nag-checkpoint nga mga polis.

Suway unta nga nilikay apan gisugat sila sa mga polis nga nag-atang daplin sa karsada hinungdan sa ilang pagkasikop.

Gipangayoan sa kapolisan sa lisensiya apan napakyas sa pagpakita ug dihang girekisa mao’y ilang nakuha kang Pugoy ang duha ka paketeng shabu ug usa ka kalibre .45 uban sa duha ka bala. (BANAT NEWS)