Dili tulis, gituyo gyud pagpatay ang Dutch

CEBU, Philippines - Planado ug dili lang usa ka tawo ang mipatay sa Dutch national nga nakit-ang wala na’y kinabuhi ug naligo sa iyang kaugalingong dugo sulod sa iyang giabangan nga lawak,pipila ka adlaw na ang nakalabay.

Kini maoy migawas sa imbestigasyon nila ni Senior Police Officer 3 Wetzil Berry, imbestigador sa Homicide Section sa Cebu City Police Office nga nahinabi sa Banat News.

Sumala pa ni Berry nga di mahimo sa usa lang ka tawo ang maong krimen ug base sa ilang obserbasyon sa crime scene, planado ang maong pagpatay tungod kay walay nadungog nga komosyon ang mga trabahante sa Turtle’s Nest Café and Gallery diha sa Barangay Kamputhaw atol sa hitabo.

Nigawas usab sa imbestigasyon nga wala nay kuwarta si Dieter Friedrich Mayer, 66 anyos.

Si Berry miingon nga gikan nga nag-abang sa usa ka apartelle ang langyaw apan kini gipalayas kay wala na’y ikaabang.

Apan gumikan sa kaluoy sa tag-iya sa Turtle Nest Café and Gallery didto na lang kini gipaabang sa ubos nga kantidad. Ang hinigugma sa langyaw nga usa ka Filipina nga nahinabi usab sa kapulisan mikompirmar nga naglisod na sa kwarta ang biktima. Aduna pay panapton nga gipaslak sa baba sa biktima dihang kini nadiskubrehan sa mga trabahante ug aduna kini bun-og sa ulo. (BANAT NEWS)