Dengue nidaghan, Cebu City nag-una

CEBU, Philippines - Nisaka ang kaso sa dengue sa Rehiyon-7 gikan sa Enero hangtud Pebrero 13 niini’ng tuiga itandi sa susama’ng mga buwan sa niagi’ng tuig base sa talaan sa Regional Epidemiology and Surveillance Unit.

Nagkanayon si Rennan Cimafranca, hepe sa RESU sa Department of Health-7 nga ang kaso sa dengue niabot na og 1,527 itandi sa 1,053 sa niagi’ng tuig.

Ang namatay gumikan sa dengue niabot na usab og 13 itandi sa upat lang sa niagi’ng tuig.

Giklaro ni Cimafranca nga ang hinungdan ngano’ng nidaghan ang dengue gumikan kay ang katawhan kuwang sa pagpanglimpyo sa tugkaran ug dili gumikan sa kalit nga pag-usab sa dagan sa panahon nga moinit unya mouwan.

Matud sa RESU ang pagsaka sa kaso wala ma-focus sa mga lugar nga tag-as og kaso sa dengue sa niagi’ng tuig tungod kay nabahin man kini sa mga dapit nga wala’y kaso kaniadto.

Dili pa usab matawag sa ahensiya nga alarming ang pagsaka sa kaso apan kini nitataw nga kinahanglan gyud i-mintinar ang kalimpyo sa palibot ug dili magsalig nga minus na ang masinati’ng pag-uwan gumikan kay nagkaduol na ang summer ug anaa pa’y El Niño.

Nasayran nga may dengue vaccine na nga gitawag og dengvaxia.

Gipasabot ni Cimafranca nga mahimo’ng mabakunahan sa mao’ng dengue vaccine ang nag-edad og 9-anyos hangtud sa 45-anyos tungod kay mao kini ang ideal nga edad nga mo-respond sa vaccine ang lawas sa tawo.

Gipaabot nga daku kini og ikatabang sa pagpakunhod sa kaso sa makamatay nga sakit.

Nagpabilin nga nag-una sa kaso sa dengue ang Dakbayan sa Sugbo nga gisundan sa Lapu-Lapu City, Toledo City, Dumaguete City ug Tagbilaran City. (BANAT NEWS)