CHED mipatunga na sa problema sa SWU

CEBU, Philippines - Miluwat og pamahayag ang Chairperson sa Commission on Higher Education (CHED) Dr. Patricia Licuanan sa kontrobersiya sa Southwestern University-College of Medicine ug sa SWU-Matias H. Aznar Memorial College of Medicine (SWU-MHAM, Inc).

Ang maong statement gipadala ngadto sa ilang Regional Office sa CHED diin nakalatid didto nga andam sila motabang sa mga tinun-an sa SWU ug SWU-MHAM Inc. pagsulbad sa problema sa duha ka tunghaan.

Sa tulo ka pahina nga pamahayag ni Licuanan kini mipasabot nga ang SWU-MHAM Inc. ang kasamtangan nga giila, gi-supervise ug gi-monitor sa CHED sulod na sa 40 ka tuig.

Naproblema ang mga tinun-an sa epekto sa stay order ug matud ni Licuanan nga lakip sila sa nabalaka sa dul-an 500 ka mga medical students sa SWU-MHAM Inc. nga giila sa ahensiya lakip na usab sa mga tinun-an sa SWU nga gikonsiderar nga dili regulated sa technical panel alang sa medical education.

Si Atty. Pacita Isugan sa CHED-7 kinsa maoy mibasa sa statement sa pamahayag ni Licuanan miasoy nga nakabutang usab didto nga ang nakitang solusyon sa ahensiya mao ang duha ka tunghaan mahimong mopadayon apan kinahanglan nga mosubay sila sa mga polisiya, standards ug guidelines sa CHED.

“The better option would be for the two institutions to exert all efforts at forging a viable and acceptable solution for their mutual benefit and possible co-existence, but that this should be in accordance with CHED Policies, standards and guidelines,” matud sa suwat ni Licuanan.

Apan si Dr. Peter Aznar ang Dean sa SWU-School of Medicine miingon nga kun adunay kinahanglan nga mo-apply og recognition kini mao ang SWU-MHAM Inc. ug dili sila.

Matud niya, niadto pang 1954 adunay government recognition ang SWU ug wala silay nadawat gikan sa CHED nga revocation ug cancellation labot sa maong pag-ila. Ang SWU miingon nga usa ka diyalogo ang himuon tali sa CHED Central Office, CHED Region-7 ug kadagkuan sa SWU ug SWU-MHAM Inc. nga giingong mahitabo karong semanaha.

Apan si Dr. Freddie Bernal, Regional Director sa CHED-7 miingon nga sa Marso 4 gikatakda nga mahitabo ang maong dialogue. Samtang si Atty. Godwin Denzil Manginsay, VP for Legal and External Affairs sa SWU nalipay nga naumol ang maong plano nga diyalogo ug nanghinaot nga maresolbar na ang problema nga ilang giatubang tungod kay ang naapektahan mao ang mga tinun-an ilabi na ang mga langyaw nga mga estudyante nga mikuha og kursong medisina.  (BANAT NEWS)