Gugma mabatyagan sa mga buhatan sa BFP-7
CEBU, Philippines - Karong Domingo, Pebrero 14 saulogon sa kadaghanan ang Valentine’s Day diin naandan ang maong adlaw nga pagpakita sa paghigugmaay dili lang sa imong hinigugma apan lakip na sa pamilya ug bisan sa barkada.
Apan diha sa Bureau of Fire Protection dinhi, gihimo nilang mas mabulokon ang adlaw sa mga kasingkasing pinaagi sa pagpanindotay sa ilang mga opisina pinaagi sa pagsab-it og mga dayan-dayan.
Sa pag-abli pa lang sa buhatan sa BFP-7, ang mga dayan-dayan nga giporma og kasing-kasing , sweet notes, ballons, ug buhatan nga napuno sa kolor pula maoy mosugat sa mga moduaw kanila.
Nanggawas usab ang nagkadaiyang konsepto ug kung giunsa nila paghatag og kahulogan ang maong adlaw pinaagi sa ilang dekorasyon sa siyam ka mga opisina sa BFP-7 sama sa opisina sa Planning Division nga napuno sa mga hugot pisi, nga daw nagpasabot mao ang hugot nga paghigugmaay.
Laing opisina usab ang daw sama sa usa ka restaurant ang ilang konsepto nga daw lugar diin mag-date ang mga managhigugmaay.
Mas kiligon pa gyud ang makasud-ong sa ilang buhatan tungod sa background music nga love song, mura ba og ‘love is in the air.’
Bisan sa ilang ka-busy og pagbantay kung adunay sunog nakahigayon gihapon ang mga kalalakin-an ug kababayen-an sa kabomberohan nga hatagan og kolor ang ilang trabaho.
Ang BFP-7 nangandam na usab karon sa umaabot nga Fire Prevention Month sa sunod buwan. (BANAT NEWS)
- Latest
