Balay sa polis gihimo drug den
CEBU, Philippines - Onse ka mga tawo ang nadakpan sa Cebu Provincial Public Safety Company atol sa ilang gihimo nga buy-bust operation sulod sa balay sa usa ka polis nga nadestino sa Bohol kagahapon sa alas 11 sa buntag diha sa Brgy.Palanas lungsod sa Alcantara.
Matud pa ni Chief Inspector Marlon Gumabao, team leader sa PPSC nga ang operasyon ilang gihimo batok ni Sotero Batulano, alyas Tiroy nga nalakip sa watchlist sa Alcantara Police Station, Provincial Anti-Illegal Drugs Special Operations Task Group ug Provincial Intelligence Branch.
Ang maong balay gipanag-iya ni SPO1 Joel Sarmiento nga nadestino sa Bohol. Apan swerte nga nakaikyas sa mga kamot sa kapulisan si Batulano apan nasikop ang 11 ka mga tawo nga ang duha niini anaa usab sa listahan sa PAIDSOTG ug PIB.
Si Gumabao miingon nga nakadawat sila og impormasyon sa ilegal nga kalihokan ni Batulano ug sa mando ni Supt. Reycel Carmelo Dayon ang hepe sa PPSC ilang gihimo ang pagpangronda.
Nakuha sa mga polis sulod sa balay ang napulo ka mga pakete sa gituohang shabu ug mga drug paraphernalia. Duha ang ilang pasakaan og kasong paghupot og drugas samtang ang laing siyam pasakaan og kaso nga “visiting to a drug den.”
Gipasabot ni Gumabao nga si Batulano ang nagsilbing handler sa manok ni Sarmiento kinsa gipapuyo sa balay sa maong polis. (BANAT NEWS)
- Latest
