Unang buhaton ni Rama, budget sa siyudad

CEBU, Philippines - Gihulagway ni Cebu City Mayor Michael Rama ang iyang duha ka bulan nga pagkasuspenso nga “humbling, fascinating ug exciting.”

“The whole 60 days was a growing journey and also it becomes rejuvenating,” matud pa sa mayor.

Gisugat si Rama sa mga kawani sa city hall ug sa barangay kagahapong adlawa isip ceremonial turnover sa accomplishment report ni Vice Mayor Edgardo Labella isip acting mayor sa panahon nga suspendido si Rama.

Magpatawag og meeting si Rama karong adlawa sa mga department heads sa City Hall aron makahibalo siya sa estado sa kagamhanan kaniadtong mga adlaw nga siya suspendido isip mayor.

Karong adlawa opisyal nga molingkod pagbalik si Rama sa iyang posisyon human sa 60-day preventive suspension nga gipatuman sa Department of Interior and Local Government kaniadtong Disyembre 10. Ang iyang suspension adunay kalambigitan sa iyang mando nga pagguba sa median structure sa Brgy. Labangon sa tuig 2014.

Adunay Thanksgiving Mass gawas sa City Hall nga gipangunahan ni Archbishop Jose Palma kagahapon.

Nagselebrar usab ang City Hall og Family Day kagahapon nga diin namahayag si Palma sa mensahe ni Papal Legate Charles Maung Cardinal Bo ang tulo ka pulong nga angay isulti sa miyembro sa pamilya ug mao kini ang “palihug,” “salamat,” ug “pasaylo.”

Naglangkob sa accomplishment report ni Labella ang pag-aprubar sa tulo ka ordinansa nga gipasar sa City Council, pag-issue niya og upat ka executive orders, pito ka sunog sa syudad, ug pagpugong sa pito ka court-ordered demolitions.

Miangkon si Labella nga ang labing lisod nga iyang gibuhat mao ang mga kalihokan sa Sinulog ug ang 51st International Eucharistic Congress.

Karong nakabalik na si Rama sa iyang pwesto, sutaon niya ang estado sa  budget sa City Hall ilabi na nga wala mapasar ang P6.4 billion Annual Budget karong tuiga.

Matud sab ni Rama nga mangayo siya og update sa kahimtang sa P2.8 billion Supplemental Budget-1 sa miaging tuig nga wala aprobahi sa konseho. (BANAT NEWS)