Paghipos sa libudsuroy magpadayon

CEBU, Philippines - Magpadayon gihapon ang kagamhanan sa Siyudad sa Sugbo sa pagluwas sa mga night dwellers ug libudsuroy bisan og human na ang kalihokan sa International Eucharistic Congress dinhi sa dakbayan.

Kini subay sa mando ni suspended Mayor Michael Rama sa iyang mga tawo ini’g lingkod niya og balik sa iyang puwesto isip mayor sa siyudad ugmang adlawa.

Matud ni Rama nga dili angay nga hunongon ang pag-rescue sa mga night dwellers tungod mao kini ang usa sa mga programa sa iyang administrasyon. Usa ka semana ayha nangabot ang mga delegado sa IEC, gironda sa kagamhanan sa siyudad gikan sa mga street children ug mga night dwellers ug gibutang sa Compaña Maritima Building sa Brgy. Ermita.

Apan giklaro sa mga opisyales sa kagamhanan nga ang pagronda adunay kalambigitan sa pag-host sa siyudad sa IEC nga  gitambongan og 15 mil ka tawo gikan sa 70 ka nasud ug sa mga probinsya sa nasud. Matud ni Cebu City Disaster Risk Reduction and Management Council operations chief Alvin Santillana nga naka-rescue na sab ang kagamhanan og 40 ka mga night dwellers sa miaging semana.

Sigon ni Santillana nga mao kini ang timaan nga dili lang sa semana sa IEC ang maong programa. Dugang niya nga misugot ang Cebu Ports Authority nga gamiton sa siyudad ang Compaña Maritima hangtod mahuman ang tukurong holding center alang sa mga libudsuroy.

“We will get them out of the streets wherein they are unsafe. Then put them in a safe place. Maybe, we can help them transform their lives into a better one,” matud niya.  (BANAT NEWS)