Wanted nisukol patay

CEBU, Philippines - Patay ang usa ka gipasanginlang notadong sakop sa gun for hire ug nalakip sa most wanted person sa probinsya sa Bohol human nakigpinusilay sa mga sakop sa Provincial Intelligence Branch sa Bohol Provincial Police Office diha sa Sitio Hulgangan, Barangay Bantuan lungsod sa Buenavista kagahapon sa alas 10:20 sa buntag.

Ang napatay mao si Ramel Tradio, alyas Ete, nagpuyo sa maong dapit kinsa gidudahang nag-operate usab dinhi sa Sugbo kun duna kini target nga patyon.

Matud pa ni Sr. Insp. Jojit Mananquil, deputy chief sa PIB nga nahinabi sa Banat News dugay na nilang gipangita si Tradio kay nagpatong-patong na ang iyang kasong pagpanulis ug pagpatay sa Bohol.

Sumala pa ni Mananquil usa si Tradio sa gitudlong suspek sa pagpatay sa magtiayong Koreano sa dakbayan sa Lapu-Lapu kaniadto apan na-dismiss ang kaso kay wala makuha ang kompleto niining pangalan.

Bitbit sa kapulisan ang duha ka warrant of arrest sa kasong robbery, qualified theft ug murder.

Matud pa ni Mananquil wala sila mokompiyansa tungod kay armado og mga tag-as nga armas sama sa M16, M14 rifles ug granada ang suspek.

Sa dihang mipaduol na sila sa balay niini, gisugat sila og buto-buto sa armas hinungdan nga nahitabo ang pinusilay nga milanat og 20 minutos dungan sa pagsige nila og awhag kaniya sa pagtahan apan pirme silang tubagon niini nga dili kini   motahan ug andam kini makigpatay.

Apan sa dihang usa sa mga polis ang hapit maigo ni Tradio nakahukom si Mananquil nga ila na lang kini nga sudlon uban ang pagplastar sa mga snipers sa kapulisan hinungdan sa kamatayon sa suspek.

Narekober sa mga polis ang usa ka 38 revolver ug mga drug paraphernalia sulod sa balay apan wala silay nakuhang high- powered nga armas.

Si Mananquil mipasabot nga gawas sa mga naunang nahisgotang kaso ni Tradio , gireklamo na usab kini og pagpanglugos sa mga asawa sa mga silingan panahon nga atoa sa trabaho ilang mga bana.

Apan walay nakaako og pagpasaka og kaso kay mahadlok   kay armado ug aduna kini grupo.

Nasayran usab ni Mananquil nga kung duna’y himoon nga trabaho si Tradio dinhi sa Sugbo, sa Cordova kini magtago ug dayon mobalik sa Bohol.

Lakip sa trabaho ni Tradio mao ang pagtipi sa mga drug pushers nga dili na makahatag og saktong bayad sa mga drug lords sa Bohol ug gituohang posibleng gamiton usab siya sa mga politiko. Sa pagkakaron nagpadayon pa ang gihimo nga operasyon sa kapulisan aron masikop ang mga kauban sa suspek.

Niadtong nakalabay nga semana una nang nadakpan ang usa sa iyang mga kauban nga maoy nakahatag og impormasyon kun hain magtago si Tradio. (BANAT NEWS)