Mga abyon spray-han vs Zika virus

CEBU, Philippines - Hugot karon ang pag-monitor sa Bureau of Quarantine diha sa Mactan Cebu International Airport (MCIA) aron dili makalusot ang Zika virus dinhi sa Sugbo nga mikuyanap sa Latin Countries.

Sa pag-abot sa mga pasahero sa international flights diha sa MCIA kinahanglan moagi sa thermal scanner aron mahibaw-an sa BOQ-7.

Ma-detect sa scanner kun sila dunay hilanat diin base sa maong kahimanan ang normal body temperature sa tawo anaa sa 37 Degrees Celsius.

Matud ni Dr. Ma. Joycelyn Lourdes Gonzales, Quarantine Medical Officer sa MCIA wala gyud nila gihunong ang pagkolekta sa health declaration checklist. Gipasabot ni Gonzales, kun ma-detect sa ilang thermal camera nga dunay pasahero nga ang body temperature anaa sa 38 Degrees Celsius pataas ilaha kining i- pullout sa linya unya dad-on sa isolation room aron paghimo og dugang pakisusi.

Dugang pa niya adunay nangabot nga mga kemikal nga gikan sa kaulohan aron gamiton sa pag-spray sa mga   eroplano sa mga international flights nga ilang gisugdan paghimo.  Tumong niini aron mamatay ang mga lamok nga anaa sa eroplano tungod kay dili man mahibaw-an basin adunay lamok nga madala ilabi na niadtong mga eroplano nga sulod-gawas lang sa Pilipinas.

Nasayran ang mga pasahero mituman hinuon sa pag fill-up sa health declaration checklist apan adunay pipila nga misuway pagmagahi apan walay mahimo sanglit pugson man gyud nila sa pagpasuwat kay mandato kini alang sa kaluwasan sa tibuok nasud.   (BANAT NEWS)