Tulo patay tungod sa selos

CEBU, Philippines - Tulo ang patay sa nahitabong pagpamusil ug pinusilay tungod lang sa pangabubho sa suspek nga usa ka tomboy diha sa Brgy. Ulbohan, Calape, Bohol, niadtong nakalabay nga gabii.

Napatay sa mga mirespondeng polis si Maricel Ramos human kini giingong nakigpinusilay kanila dihang kini dakpon unta tungod sa pagpusil niini sa manag-inahang Rosita Cuario, 74, ug sa anak nga si Joel Cuario,45, atol sa pag-hostage niini kanila.

Matud pa ni Superintendent Ricky Delilis sa Bohol Police Provincial Office nga nakahinabi sa The Freeman ug Banat News ang suspek nagselos sa iyang uyab nga policewoman nga nadestino sa Calape Police Station.

“Nagsimula sa selos, allegedly ang isang police na si (PO1) Rosalie Cuario, ito ang na-augment sa IEC, parang nagkaroon ng misunderstanding, pumunta si Maricel Ramos sa bahay nila,” matud pa ni Delilis.

Dugang pa ni Delilis nga si Ramos kalit nga gipamusil ang inahan ug igsuon sa iyang uyab nga polis. Naangol usab ang laing igsuon sa polis nga si Vicente,51, ug gidala sa tambalanan sa Dakbayan sa Tagbilaran.

Ang mga namatay pulos nakaangkon og samad pinusilan sa ulo. Dali nga misibat si Ramos paingon sa silingan nga barangay sa Liboron diin kini mitago.

Ang direktor sa BPPO nga si Sr. Supt. Denis Agustin daling naabot sa maong lugar ug nagsilbing ground commander ug nakignegosasyon aron patahanon sa malinawon ang suspek. Apan matud pa gikatahong kalit lang gipamusil ni Ramos ang mga polis hinungdan nga ilang gibawsan hinungdan nga natusak-tusak sa bala ang lawas niini ug namatay. Ang armas nga gigamit ni Ramos nga Glock 17 mao ang gikatahong daog ni PO1 Cuario sa usa ka “contest” sa BPPO nga gihatag niini ngadto sa suspetsado. (BANAT NEWS)