Zika virus NiA sa sugbo kaniadto

CEBU, Philippines - Dili na bag-o sa Pilipinas partikular sa Rehiyon 7 ang gikahadlokang mag-outbreak nga Zika Virus kay ang Department of Health (DOH)-7 aduna nay pasyente nga giatiman nga nataptan sa maong virus niadtong tuig 2012.

Ang maong pasyente matud pa usa ka  batang lalake nga niadtong tungura nagpangidaron pa lang og 15-anyos nga ilang nasayran nakabiyahe na sa laing nasud.

Ang World Health Organization (WHO) mideklarar nga usa ka global health emergency na karon ang maong virus tungod kay nagkadaghan na ang kaso ilabi na didto sa Latin America sama sa Brazil.

Apan ang DOH-7 mipasalig nga Zika virus free pa gihapon ang Pilipinas ug walay angay kabalak-an.

Ang Zika virus nakapabalaka sa publiko sanglit mikatag na kini sa ubang nasud ug sagad sa mga matakboyan mga mabdos nga gituohang napaakan sa Aedes Aegypti nga lamok, ang matang sa lamok nga nagdala usab og sakit nga makamatay nga dengue.

Gipasabot sa DOH-7 makuha ang Zika virus pinaagi sa paak sa lamok diin ang mga sintomas niini susama sa dengue nga hilanat, rashes, pagpanakit sa mga lutahan, conjuncvitis kon puwa ang mata.

 Apan ning bag-ohay lamang, adunay bag-ong kaso didto sa Dallas, Texas, USA nga aduna silay pasyente nga natakboyan pinaagi sa pakighilawas sa tawong adunay sintomas sa virus human nibiyahe sa nasud nga adunay ingon niini nga mga kaso.

Matud ni Dr. Eugenia Mercedes Cañal, Medical Officer IV sa DOH-7 walay gipili nga edad  ang maong virus apan nakita sa gihimong pagtuon kadtong mga mabdos mas taas og risgo.

Ang virus mapasa ngadto sa gimabdos ug ang epekto niini, mogamay ang ulo sa bata kun kining gitawag nga Microcephaly ug uban ang komplikasyon sa pag-develop sa utok sa bata.

Sama sa anti-dengue campaign, hingusgan sa DOH ang Search and Destroy, Seek Early Consultations, Say Yes to Fogging ug kining gitawag nga Self Protection.

Si Dr. Sophia Mancao, Assistant Regional Director sa DOH-7 miklaro nga ang Pilipinas partikular na ang Sugbo luwas gihapon gikan niini nga virus ug nakig-alayon sila sa Bureau of Quarantine pag-monitor sa mga tugpahanan. (BANAT NEWS)