Pag-ayo sa taytayan dayonon na

CEBU, Philippines - Ipadayon na sa Department of Public Works and Highways ang pag-ayo sa Mactan-Mandaue Bridge human naoktaba gumikan sa kalihukan sa Sinulog 2016 ug 51st International Eucharistic Congress sa Sugbo.

Si DPWH-7 Director Ador Canlas niingon nga mahingpit na ang ila’ng pagpatuman sa proyekto apan human sa konsultasyon nga ila’ng pagahimuon sa mga lokal nga kagamhanan ug sa nagkadaiyang sektor.

Naglakip sa ila’ng konsultahon ang mga opisyal sa kagamhanan sa mga Dakbayan sa Mandaue ug Lapu-Lapu, mga magpapatigayon, mga molupyo ug mga tinun-an.

Mokabat sa P129 milyones ang salapi nga gigahin sa nasudnong kagamhanan pinaagi sa DPWH-7 nga naglakip sa pag-ayo sa taytayan, pagbutang og karsada sa ilawom nga bahin, pagsemento sa dalan Plaridel ug dalan A. Soriano Avenue.

Si Engineer Reynult Ricardo, sa DPWH 6th District Engineering Office, niingon nga unahon ang usa ka lane aron magamit ang pikas lane sa karsada samtang magpadayon ang trabaho. Susama usab ang himuon sa taytayan aron dili hingpit nga masirad-an sa mga sakyanan.

Si Architect Florentino Nimor, City Planning Officer sa Mandaue ug executive director sa Traffic Enforcement Agency of Mandaue (TEAM), niingon nga ang dalan Sotero B. Cabahug sa Ibabao-Estancia mao’y mahimo’ng altenatibo’ng kaagian sa mga sakyanan sa higayon nga magpadayon ang road concreting sa dalan Plaridel ug A. Soriano.

Gumikan niini ila’ng gioktaba ang gikatakda na unta nga pagpatuman sa bicycle lane sa dalan Sotero Cabahug sanglit ang mao’ng dalan mao man usab ang magsilbi’ng alternatibo’ng kaagian sa mga sakyanan gikan sa Marcelo Fernan Bridge ug sa mga sakyanan nga mopadulong sa Dakbayan sa Lapu-Lapu. (BANAT NEWS)