#iambutuanon project gilusad

CEBU, Philippines - Giaprobahan na sa kagamhanan sa Dakbayan sa Mandaue ang giduso nga #iambutuanon project sa Environmental Management Bureau-7 uban sa Butuanon River Watershed Management Board (BRWMB).

Si Atty. Giovanni Tianero, City Legal Officer, kinsa nangulo sa board meeting sa habig ni Mayor Jonas Cortes, nipadayag sa suporta alang sa proyekto.

Nasuta nga ang siyudad nigahin og P13.5 milyones nga pundo alang sa rehabilitasyon sa Butuanon ug ang mao’ng pundo alang sa imprastraktura. Ang #iambutuanon project mo-ugmad og responsive behavior ug mga pagtulun-an nga mahimong gabayan aron pagtubag sa mga panginahanglanon sa komunidad duol sa Butuanon River.

Ang Department of Education-Mandaue City Division ang nipadayag usab sa ilang suporta ngadto sa EMB-7 tumong sa pagbuhi og balik sa Butuanon River.

Si Dr. Arden Monisit, school’s division superintendent, niingon nga andam ang ahensiya sa pagpaluyo sa tinguha sa EMB-7 alang usab sa komunidad.

Kini ang labing una diin ang EMB-7 nakig-alayon sa DepEd-Mandaue aron pagprotehir sa kalikupan.

Gipadayag sa EMB-7 ngadto sa kagamhanan ang dinalian nga pagtubag sa panginahanglanon sa mga kabus nga pamilya sama sa pagkaon, kapuy-an ug edukasyon aron makatabang sila alang sa restoration sa Butuanon River. Ang proyekto mogamit sa mga resources sa mga partners sa EMB-7 lakip na usab sa international organization aron maoy moatiman sa panginahanglanon sa mga informal settlers.

Pag-establisar og tunghaan nga molungtad og dugay ug eco-friendly maoy usa sa implementing components sa #iambutuanon project.

Si EMB-7 Director Wiliam Cuñado niingon nga sa dili pa nila hingpit nga ipatuman ang proyekto, una nga pagahimuon ang pagpangayo sa suporta sa mga magpapatigayon ug sa ubang sektor   sa Dakbayan sa Sugbo ug Mandaue.

Matud pa ni Cuñado nga gipili usab nila ang mga publikong tunghaan nga magsilbing pilot area sa proyekto diin nalakip niini ang Tabok Elementary School, Basak Elementary School, Paknaan Elementary School, Umapad Elementary School ug uban pa’ng tunghaan nga nahimutang duol sa Butuanon River. (BANAT NEWS)