PNoy: BBL ipadayon bisan wa na siya sa pwesto

CEBU, Philippines - Mipagawas og kamandoan si Presidente Benigno Aquino III nga mohimo og mga espesyal nga paningkamot ang gobiyerno aron mapatuman ang dugay na kaayong sabot-kalinaw sa mga rebeldeng Muslim ug sa gobiyerno bisan wala na siya sa pwesto.

`Sumala pa sa report sa Rappler.com, ang mga magbabalaod mipasidaan nang posibleng di gyud nila mapasar ang Bangsamoro Basic Law sa dili pa mapupos ang termino ni Aquino karong bulan sa Hunyo.

Gusto karon ni Aquino nga adunay himuong konsultasyon ug panagtigom sa tanang mga stakeholders aron mapadayon ang proseso ug matagamtaman ang benepisyo nga makuha gikan niini, matud pa sa tigpamaba sa Malacañang nga si Herminio Coloma.

Ang pagpasar sa BBL nahimong suliran ni Aquino tungod kay mao kini ang iyang gipanglantawang solusyon sa kapin upat ka dekada nang kagubot sa Mindanao nga nakaingon nga nabiyaan ang maong lugar sa kalamboan.

Ang BBL maoy resulta sa pakigsabot sa gobiyerno sa nahibiling kinadak-ang grupo sa mga rebeldeng Muslim nga Moro Islamic Liberation Front (MILF).

Usa sa gibasol nga hinungdan sa pagkatanggong niini diha sa Ubos Balaybalauranan mao ang pirmeng pag-absent sa mga magbabalaod sa sesyon sukad pa sa tungatungang bahin sa tuig 2015 hangtud karon.

Ang BBL maoy mohulip unya sa kasamtangang Autonomous Region in Muslim Mindanao nga giisip nga palpak nga programa nga gihimo sa gobiyerno kay wala niini masulbad ang problema nga maoy hinungdan sa rebelyon. (BANAT NEWS)