Barko sa US Navy ‘mihagit’ sa China

CEBU, Philippines - Walay pananghid nga milawig ang barko sa US Navy nga USS Curtis Wilbur sa Paracel Island sa West Philippine Sea nga giangkon sa China, Taiwan, ug Vietnam, aron hagiton ang naghinobrang pagpangangkon sa maong lugar (wa panganli ang China) nga nakawagtang sa kagawasan sa paglawig sa maong lugar.

"I can confirm the Department of Defense conducted a freedom of navigation operation in the South China Sea on Jan. 30 (Jan 29 EST), specifically in the vicinity of Triton Island in the Paracel Islands, to challenge excessive maritime claims," sumala pa ni Commander Bill Urban, tigpamaba sa Pentagon report sa usa ka pamantalaan didto sa US.

Ang maong paglawig sa lugar gihimo 12 nautical miles gikan sa kinaduolan nga islang giilog sa China,  matud pa gituyo nga wala ipananghid kay  alang sa Amerika ang WPS usa ka international water ug di kinahanglang mananghid ni bisan kinsang nasud nga nangangkon niini.

Matud pa sa Amerika, ang naghinobrang pagpangangkon sa Triton Island wala masubay sa international laws nga maoy nalatid sa Law of the Sea Convention.

"During the operation, the USS Curtis Wilbur, transited in innocent passage within 12 nautical miles of Triton Island," matud pang Urban.

Giklaro hinuon niya nga dili kini paghagit sa pagpangangkon og teritoryo kondili paghagit kini sa pagdili ni bisan kinsa nga makalawig sa maong dapit.

Milanat og tulo ka oras nga nagbahasbahas ang maong barko sa lugar apan walay bisan usa ka Chinese nga barko nga mibadlong kanila.

Giklaro usab sa US nga wala silay gidapigang nasud sa isyu sa panag-ilog sa teritoryo, ang ila lang mao nga sigurohon gyud nga wala’y nasud nga magbuot diha sa maong dapit nga mao karoy gustong ipatuman sa China.’Apan sa report sa Associated Press, ang China mikondenar sa maong biyahe sa US Navy kay matud pa nakalapas kini sa ilang soberiniya ug gitawag nila kini nga “unprofessional and irresponsible” ug nagdala og kagubot sa rehiyon.

Apan si Vietnamese Foreign Ministry spokesman Le Hai Binh miingon walay dautan sa gibuhat sa US, kay matud pa ilang gitahod ang "innocent passage" sa bisan kinsang barko sa lugar subay sa international law. (BANAT NEWS)