Probinsiya sa Sugbo nagmingaw

CEBU, Philippines - Namatikdan sa kapolisan ang kamingaw sa kalungsuran ug mga dakbayan sa Lalawigan sa Sugbo sanglit ang kadaghanan sa mga molupyo sayo sa buntag pa nanggikan sa pagtambong sa misa sa pagtak-op sa 51st International Eucharistic Congress (IEC) sa South Road Properties kagahapon.

Si Police Officer 3 Romero Morales sa Cebu Provincial Police Office (CPPO) nga nahinabi sa Banat News niingon nga wala’y dagku’ng panghitabo nga natala sa kalungsuran ug mga dakbayan.

Kini gikompirmar usab ni Police Officer 1 Arsie Gatingo sa Danao City Police Station.

Matud ni Gatingo nga nagpadala usab sila og ila’ng sakop sa kapolisan sa pagtabang sa pagbantay sa kahapsay ug kalinaw sa kalihukan sa IEC.

Si Police Officer 2 Barry Gabutin sa operation sa Mandaue City Police Office (MCPO) nga nahinabi sa Banat News niingon nga wala’y dagku’ng panghitabo nga natala sa unom nila ka presinto.

Gitataw niya nga sa monitoring nga ila’ng gihimo sa palibot sa dakbayan bisan sayo pa sa buntag kagahapon mao’y namatikdan ang pagdagsang sa mga pasahero paingon sa Dakbayan sa Sugbo aron pagtambong sa misa IEC sa SRP. (BANAT NEWS)