Malampuson ang 51st IEC

CEBU, Philippines - Mokabat sa kapin usa ka milyon ka tawo ang nitambong sa Statio Orbis, ang kataposang Santos nga Misa sa pagtak-op sa makasaysayanong 51st International Eucharistic Congress nga gihimo dinhi sa Sugbo.

Bisan sa pagdautan sa panahon sayo kagahapon sa buntag, napapas dihang padung na ang kahapunon ug magsugod na ang Santos nga Misa nga gihimo diha sa San Pedro Calungsod Templete sa South Road Properties.

Ang kapin 15 mil ka mga delegado nga gilangkoban ug gipangulohan mismo ni Papal Legate Charles Maung Cardinal Bo uban sa mga kaparian, layko, mga Obispo ug Cardinals gikan sa nagkalain-laing mga nasud ug probinsya sa Pilipinas ang mitambong.

Napun-an kini  og uban pang mga tawo nga buot mosimba sa maong kalihokan nga maisip nga kausa lamang mahitabo sa tibuok nilang kinabuhi.

Mensahe

Daghan sa mga mitambong ang nakahilak samtang naminaw ug nagtan-aw sa 12-minutos nga video message ni Pope Francis.

Sa mensahe sa Santo Papa, kini nalipay nga ang kalihukan sa IEC nakapahiusa sa mga tawo nga gikan pa sa nagkalain-laing lugar.

 Kini midugang atol sa iyang pagduaw sa Pilipinas subay na sa nahitabo sa bagyong Yolanda siya mismo nakasaksi sa grabeng pagtuo sa mga Pilipino ngadto sa Kahitas-an.

Nakita niya nga bisan sa kadaot nga dala sa bagyong Yolanda niadtong 2013 nakita gihapon ang pagtinabangay ug pagpakita sa katawhan sa ilang gugma ngadto sa mga nagkinahanglan.

Nanghinaot ang Santo Papa nga ang IEC magdala og panag-uliay ug kalinaw lukop kalibutan. Matud pa niya ang inhustisya ug kurapsyon maoy nakapaguba sa katilingban maong kinahanglang isentro kanunay ang Eukarestiya sa tagsatagsa ka kinabuhi.

Iyaha usab gipahimug-atan ang pagtulon-an sa paghugas ni Kristo sa mga tiil sa iyang mga desipolo nga nagsimbolo sa pagpaubos.

“The Eucharist is a school of humble service,” matud pa sa Santo Papa.

Eukarestiya

Samtang si Cardinal Bo, sa iyang wali miingon nga ang simbahan wala gitukod aron mangwarta kung dili aron maghatag og paglaum ngadto sa katawhan.

Giawhag ni Bo ang mga Pilipino nga padaghanon ang kaliwatan niini ug pakaylapon sa tibuok kalibotan aron modaghan ang mga katoliko ilabi na ngadto sa Uropa ug ubang mga nasud nga hinay-hinay nang nawala ang pagtuo ilabi na sa mga kabataan.

Matud niya ang simbahan angayan dad-on bisan sa merkado, sa kadalanan ug ilabi na ngadto sa mga kabus aron makauban si Kristo.

Si Bo, nipadayag adunay daghang adunahang mga nasud apan kabus sila sa banay kay ilang kauban sa panimalay mga kahayopan na lang tungod kay wala silay mga anak.

Matud pa niya, dili kinahanglan nga ang Simbahan maoy duolon sa kabataan kundili, ang Simbahan maoy angay moduol sa kabataan ug angay silang sabton ug dili hukman.

Nawili sa Sugbo

"What a great host you are. What a great experience. For the last 7 days you made us all proud to be Catholics. You broke the bread of hospitality, warmth, and your smile. You are apostles of smiling… How can we forget the warmth, the smile, the dance, the piety, and the fellowship of all of you. What a deep experience of table fellowship," matud pa ni Cardinal Bo.

Nagpasalamat

Si Cebu Archbishop Jose Palma sa iyang bahin, nagpasalamat usab ngadto sa katawhan ug sa mga delegado lakip na sa mga komitiba nga nitabang sa kalamposan sa kalihokan.

Nangayo usab kini og pasaylo sa mga tawo nga maapektuhan sa trapik gumikan niini.

Nagpasalamat usab kini ngadto sa tanang delegado nga mianhi gyud sa Sugbo bisan pa man sa kalayo sa ilang lugar diin gi-mention gyud niini ang mga delegado sa Taiwan nga maoy pinakadaghan nga miabot sa 600 ka tawo.

Ang mga Taiwanese delegates gipangulohan mismo sa ilang bag-ohay lang nga napiling bise presidente niadtong Enero 18 nga piniliay sa Taiwan nga si Bise Presidente Chen Chien-Jen, 64, nga usa ka debotong Katoliko.

52nd IEC

Samtang gianunsiyo ni Pope Francis ang sunod nga International Eucharistic Congress mahitabo sa Budapest, Hungary sa tuig 2020. (BANAT NEWS)