Rama, 2 kapitan gikiha tungod sa rally
CEBU, Philippines - Mag-atubang na og kaso sa buhatan sa Ombudsman sila si Mayor Michael Rama, Association of Barangay Council president Philip Zafra ug Barangay Tinago Kapitan Joel Garganera.
Gimanduan ni Jane Aguilar, in-charge sa Evaluation and Investigation Office sa buhatan sa Ombudsman-Visayas sila si Rama, Zafra ug Garganera sa pagduso sa ila’ng tubag sa reklamo nga gipasaka sa usa ka Patricio Salado Jr.
Kini may kalambigitan sa lihok protesta nga gihimo gawas sa City Hall sa mga kawani niadto’ng Oktubre 7, 2015 nga nag-awhag sa konseho sa pagpasar sa Supplemental Budget-1.
Matud ni Salado nga paingon unta siya sa City Hall kay may transaksiyon apan ang mga kawani ug pipila ka department heads ang diha sa gawas nga nagpahigayon sa lihok protesta hinungdan nga wala na lang siya nipadayon.
Si Zafra nihangop sa pagpatubag kanila sa reklamo bisan wala pa siya kadawat sa kopya sa reklamo.
Si Garganera usab sa iyang bahin nagkanayon nga ang ilang pagprotesta subay lang sa ilang katungod.
Matud ni Garganera nga buot lang sa kabarangayan nga ipasar ang SB-1 tungod kay nalakip niini ang pundo sa pagbayad sa basura sa barangay.
Makigtagbo si Garganera kang Zafra ug Rama aron sa pagtubag sa reklamo batok kanila. (BANAT NEWS)
- Latest
