Idlas nga drug pusher sa Banilad nadakpan

CEBU, Philippines - Nasikop sa kapolisan ang idlas nga tigpayuhot og gidiling drugas sa Barangay Banilad atol sa buy-bust operation nga gihimo sa mga sakop sa PNP Criminal Investigation and Detection Group-7 kagahapon sa udto.

Si Senior Inspector Delfin Bontuyan niila sa dinakpan nga mao si Segundo Sabaldan Jr., 35, kinsa gipanid-an sa mga sakop sa CIDG sulod sa mga tulo ka buwan.

Mga 30 gramos nga shabu nga gibana-banang mokantidad og P300 mil ingon man .38 kalibre nga revolver ang nasakmit gikan kang Sabaldan. Wala hinuon mosukol ang suspetsado.

Sumala pa ni Bontuyan nga usa sa mga paagi ni Sabaldan aron dili madakpan mao nga adto kini matulog sa ibabaw sa iyang balay aron dali nga makabantay sa mga mosulod nga polis.

Ang kapitan sa Barangay Banilad apil nga nireklamo batok sa suspetsado kay kini abusado kaayo ug magdala-dala og armas.

Matud ni Bontuyan nga si Sabaldan mao’y giila nga lider-lider sa mga tigpayuhot og ilegal nga drugas sa maong dapit.

Gitug-an ni Bontuyan nga lisud sudlon ang gipuy-an sa suspetsado kay nahimutang kini sa sudlonon nga bahin sa maong dapit.

Apan kagahapon sa udto, ang suspetsado napalitan nila og usa ka pakete nga shabu pinaagi sa usa ka asset mao nga gidakop dayon siya sa mga polis nga nagpahimutang nang daan sa maong dapit.

 Giandam sa kapolisan ang kaso nga paglapas sa Republic Act 10591 (Firearms Law) ug Comprehensive Dangerous Drugs Law batok ni Sabaldan nga anaa gitanggong sa bilanggoan sa CIDG-7. (BANAT NEWS)