IEC mass sa SRP padayon bisan uwan

CEBU, Philippines - Bisan pa man og dili maayo ang lakat sa panahon karong Domingo atol sa katapusang misa sa Statio Orbis sa San Pedro Calungsod Template, ipadayon gihapon ang Santos nga Misa.

Matud ni Fr. Brian Brigoli, chairman sa venue committee, nga sa pagkakaron wala pa siya’y nadawat nga kamanduan nga ibalhin ang venue gikan sa South Road Properties.

Sumala pa ni Brigoli, rain or shine ang kalihukan sa SRP ug dili usab kini problema tungod kay aduna ma’y rain coat ang mga delegado. Gibutyag ni Brigoli nga padayon pa sila karong nagtrabaho sa luna sa SRP ug malaumon nga motuang ang uwan.

Ang SRP manager nga si Roberto Varquez nibutyag nga naa na sila karon sa 90 porsiyento sa preparasyon ug malaumon nga mahunong na ang uwan aron magpadayon sila sa trabaho sa pagpabantok sa yuta.

Giawhag ni Varquez ang katawhan nga motambong sa Misa nga magdala og kalingkuran ug payong para sa ilang kaugalingon.

Samtang mabulukon ang ika-upat nga adlaw sa 51st International Eucharistic Congress nga gitambungan gihapon sa liboan ka delegado gikan sa 71 ka nasud.

Gisugdan sa usa ka morning prayers ang adlaw nga gipanguluhan ni Most. Rev. Stephen Lee Bum Sang, DD, ug gisundan gilayon sa Catechesis ni Most. Rev. Thomas Menamparampil ubos sa tema "The Eucharist as Mission, Mission as Dialogue".

Sa pagpaambit ni Menamparampil gipahimug-atan niini nga daghan na kaayo og klase ang ka kabus nga naglambigit sa human trafficking, pagpanaugdaug ug uban pa apan kining tanan ipahimutang gihapon sa Ginoo sa tukma nga panahon.

Sumala pa ni Menamparampil kinahanglan gyud adunay pakigsandurot sa usa’g-usa tungod kay importante kaayo ang kalinaw aron adunay kahiusahan ang tanang katawhan.

Sa ika-upat nga adlaw sa Kongreso, tunga lang sa adlaw ang katekismo tungod kay dali nga namiya ang mga delegado padulong sa lugar diin sila mahimutang alang sa Parish Encounter.

Sa Dakbayan sa Mandaue, gipagamit sa kabarangayan ang napulo ka All Purpose Vehicle (APV) ngadto sa Mandaue City Police Office alang sa pagdugang sa sakyanan sa kapolisan atol sa mga kalihukan sa IEC.

Si Roger Paller, city information officer, niingon nga gi-turnover ang mga sakyanan ngadto ni MCPO Director Senior Superintendent Jonathan Cabal.

Naglakip sa mga dapit diin gihimo ang kalihukan sa IEC mao ang San Roque Parish sa Subangdaku, National Shrine of Saint Joseph sa Centro, Holy Family Parish Maguikay ug uban pa.

Ang MCPO adunay unom ka presinto nga nagbaton usab og mga sakyanan.

Sa Dakbayan sa Talisay, siyento porsiyento nang andam ang kapolisan sa gikatakdang pagpahigayon og Santos nga Misa ni Papal Legate Charles Maung Cardinal Bo sa Don Bosco Church sa Barangay Lawaan III karong Domingo sa buntag.

Si Supt. Germano Mallari, hepe sa kapolisan sa dakbayan, nagkanayon nga 40 ka police personnel ang iyang ipakatap samtang laing pwersa sa barangay tanod ug mga sakop sa City of Talisay-Traffic Operation Development Authority (CT-TODA).

Si Mallari niasoy nga lain unya nga 10 ka police personnel nga gikan sa headquarters sa Cebu Provincial Police Office (CPPO) ang motabang sa pagmintinar sa kahapsay ug kalinaw. Gilauman nga gamay ra ang mokuyog nga delegado apan gibana-banang 300 ngadto sa 500 ka tawo ang motambong sa usa ka oras nga Santos nga Misa.

Human sa Santos nga Misa, mobalik sa Siyudad sa Sugbo ang Papal Legate. Ang Papal Legate mosuroy karong hapon sa Barangay Pasil diin nahimutang ang Don Bosco Youth Center ug ang Don Bosco Training Center nga gipadagan sa mga paring Salesiano diin sakop ang Cardinal.

Si Cardinal Bo ang nahimong usa ka pari ubos sa Salesians of Don Bosco nga naila usab sa tawag nga Society of St. Francis De Sales nga gitukod ni Saint John Bosco sa ulahing bahin sa 19th century. (BANAT NEWS)