Nagpatukod og mga kapilya sa Bohol apil sa IEC

CEBU, Philippines – Nagpaluyo sa Barug Kapilya sa Bohol human nangaguba sa pag-igo sa 7.2 magnitude nga linog niadtong 2013 ang niapil karon sa 51st International Eucharistic Congress sa Sugbo.

Siya mao si Niel Alexandar Diola, physical therapist nga nagbase sa Tampa, Florida.

Matud ni Diola nga gasa sa Espiritu Santo ang paghimo nila sa Barug Kapilya tungod kay laraw lang gyud niya ang pag-apod-apod og tubig sa Bohol pinaagi sa hangyo sa iya’ng higala nga si Gau Abarri.

Apan pag-abot nila sa Quarry Tontonan, Clarin, Bohol, ang lugar nga ila’ng gibarugan usa diay ka kanhi kapilya nga hurot gyud og ka lukapa tungod sa linog hinungdan nga nadesideran nila nga motabang sa pagsugod pagpabarug.

Sumala pa ni Diola nga wala sila mopasalig nga humanon gyud ang kapilya aron adunay mahimo ang komunidad nga sila motabang, maampingan ug makapangangkon usab sila og parte sa pagpatukod sa kapilya.

Giseguro nila ang mga kapilya tungod kay mahimo kini’ng magamit alang sa pag-ampo sa katawhan, ug katun-an sa mga bata ug sa umaabot pa nga henerasyon.

Aduna na’y 15 ka kapilya ang napabarug kuyog sa grupo nga ang kaliwat Bol-anon sa Florida.

Gipahibawo usab ni Diola nga laraw nila karon nga mopatukod na usab og mga kapilya sa Northern Cebu.

Pipila ka delegado sa 51st IEC nga iya’ng mga higala ang iya usab pabisitahon sa mga kapilya nga ila’ng napatukod tungod sa pagtuo nga diha sa kapilya mapahugtan ang pagtuo ngadto kang Kristo.  – /GMR) (BANAT NEWS)