Cyber crime laws huyang

CEBU, Philippines – Nagpangutana karon si Bokal Arleigh Sitoy sa mga miyembro sa Inter-Agency Council Against Trafficking (IACAT) kung aduna ba kini nakitang depekto o kuwang sa kasamtangang cyber crime laws sa nasud aron ang mga lokal nga kagamhanan  makagama og parallel nga programa o balaod batok sa maong mga krimen.

Kini aron usab mapalapdan pa sa national nga kagamhanan ang balaod nga magsumpo ang mga krimen nga gigamitan og internet.

Si Sitoy nagkanayon nga taud-taod na ang cybersex crimes diha sa lungsod sa Cordova ug bisan pa sa kadaghan na sa mga nangadakpan aduna pa  gihapoy mga kasong madiskubrehan sa maong lungsod.

Si Provincial prosecutor, Pepita Jane Petralba nagkanayon nga ang implimentasyon sa cyber crime laws wala pa ma-fine tune tungod kay wala pay national cyber crime plan o cyber security plan. Matud ni Petralba nga ang pagbaton og cyber crime plan mao unta kini main protocol sa implimentasyon sa tanang cyber crime laws.

Gipasabot ni Petralba nga kung maghisgot kabahin sa cyber crime laws dili lang kini sa child pornography law, photo and video voyeurism law, trafficking law ug uban pa nga balaod.

Matud ni Petralba nga ang  maghimo unta sa national cyber crime plan mao ang coordinating body sa Office of the President.

Ang Cyber Crime Investigation and Coordination Center (CCICC) ang mag-chair niini mao ang Department of Science and Technology (DOST), ang vice-chair mao ang director sa National Bureau of Investigation (NBI) ug lakip sa miyembro niini gikan sa Department of Justice (DOJ), Philippine National Police (PNP), pribadong sektor ug academe.

Ang CCICC mao unta ang policy making body ug isip policy making body mao kini ang mag-formulate sa national cyber crime plan. Apan ang coordination body alang sa operasyon ang DOJ.

Sa iyang bahin, si NBI-7 director, Ricardo Diaz mipaambit kung giunsa nila pagkuha og impormasyon may kalambigitan sa ilang operasyon batok sa cyber crime.

Matud niya nga duna silay koordinasyon sa United States Homeland Security nga naghimo usab og surveillance sa mga US citizens nga nalambigit sa child pornography o child trafficking sa US.

Si Senior Inspector Michael Vertudazo sa PNP-Regional Anti-Cybercrime Office-7 nagkanayon nga duna sila’y upat ka polis nga na-train isip mga cyber cops.

Ang maong mga polis maoy magpahigayon og surveillance, search and seizure sa mga ebidensiya ug uban pa.

Dugang ni Vertudazo nga duna silay kapasidad sa pagpahigayon og eksaminasyon sa tanang mga ebidensya nga masakmit sa ilang operasyon sama sa cellphone ug hard drives, SD cards sa gadget o computer ug uban pang mga storage medium. – /EIM) (BANAT NEWS)