26 ka loose firearms nasakmit

CEBU, Philippines – Mokabat sa 26 ka mga nagkalain-laing loose firearms ang nasakmit sa sakop sa Provincial Intelligence Branch (PIB) sa Cebu Provincial Police Office ug mga sakop sa Criminal Investigation and Detection Group-7 sa managlahing lugar sa dakbayan sa Danao kagahapon sa buntag.

Kagahapon sa alas 6:30 sa buntag duha ka mga balay ang gironda sa PIB diha sa Brgy. Looc ug Suba nga miresulta sa pagkasikop sa duha ka mga tawo ug pagkasakmit sa 24 ka mga armas.

Unang gironda ang pinuy-an ni Francisco Capuyan sa Brgy. Suba ug nakuha ang tulo ka .45 caliber pistols, tulo ka magazine, pito ka .38 revolver ug duha ka mga shotguns.

Sunod nga gironda sa mga pulis ang balay ni Junard Castro, sa Looc, diin nakuha ang 12 ka .45 caliber pistols ug 12 ka mga magazines.

Si Superintendent Rodolfo Alborta, hepe sa Provincial Intelligence Branch nga nahinabi sa mga tigbalita miingon nga pulos ekspertong manghimoay og armas ang duha.

Ang operasyon gihimo subay sa mando ni Sr. Supt. Clifford Gairanod nga kabahin sa nagsingabot nga eleksyon ug gilikayan nilang magamit ang maong mga armas sa mga goons unya sa mga politiko.

Gikataho nga nagsilbing "quality controller" ang duha aron pagsiguro kun maayo ba ang kalidad sa armas.

Apan si Castro nga nahinabi sa Banat News miingon nga igo lang gipaayo sa iyaha ang 12 ka .45 pistols bugti sa bayad nga P250 matag usa.

Giangkon ni Castro nga gumikan kay wala kini laing trabaho napugos kini sa pagsulod sa pag-repair og armas bisan og wala kini papeles.

Duna’y lima ka mga gagmay nga anak si Castro diin bugtong gisaligan sa ilang panginabuhian mao ang pag-ayo sa mga armas.

“Buhi ra man gyud sir kay naa man gyod moabot kay magpaayo, pero karon nga gun ban, usahay naa’y adlaw nga hinay gyod, wala man pud ko’y laing trabaho,” matud pa ni Castro.

Samtang si Capuyan miingon usab nga duna’y mga armas nga iyang gi-repair gikan sa mga security agency.  Sa gihapon P250 ang iyang pangayo kung pistola ang ipaayo samtang P700 kung tag-as sama sa shotgun.

Samtang ang mga sakop sa CIDG-7 ang misakmit usab sa duha ka KG9 sub machine pistols atol sa ilang operasyon diha sa Sitio Maghilaw, Masaba sa Dakbayan sa Danao kagahapon sa buntag.

Nasikop atol sa operasyon sila si Anastascio Segara Intero Jr., ug Antonieto Perez nga naaktohan nga sulod sa ilang himoanan og armas.

Gawas sa duha ka KG9s duna pa’y mga nagkadaiyang parte sa mga pistola ang nakuha sa grupo ni Supt. Fermin Armendarez III, ang deputy chief sa CIDG-7 diin kini kabahin usab sa kampanya sa CIDG-7. – /EIM) (BANAT NEWS)