Papal Legate molibot sa Pasil
CEBU, Philippines – Gipangandaman pag-ayo sa Barangay Pasil ang pagbisita ni Papal Legate Charles Maung Cardinal Bo sa ilang lugar nga mahitabo sa Enero 28, adlaw’ng Huwebes sa alas-4 sa hapon.
Nasayran nga gilakip sa itinerary ni Cardinal Bo ang Barangay Pasil sanglit sa maong lugar man nahimutang ang Don Bosco Youth Center ug Don Bosco Training Center nga gipadagan sa mga paring Salesiano nga mao ang congregation sa Cardinal.
Ang kadagkuan sa barangay nakigtagbo na sa ilang mga molupyo aron mapangandaman ang pagbisita ni Cardinal Bo.
Matud ni Pasil Barangay Captain Julius Guio-guio inay magsakay, maglakaw lang ang Papal Legate sa dalan L. Flores gikan sa eskina sa Tupaz ngadto na sa Don Bosco Pasil.
Samtang ang Philippine Coast Guard mibisita na usab sa Barangay Pasil aron sila maoy mobantay sa habig sa luyo nga bahin sa Don Bosco nga nag-atubang sa dagat.
Si Fr. Orly Borres sa Don Bosco Training Center sa Pasil sa iyang bahin miingon nga molibot sa nagkalain-laing shop sa ilang training center si Cardinal Bo ug makigsalo kini og panihapon sa mga paring Salesiano ug sa mga kabataan.
Nasayran nga si Cardinal Bo, nahimong usa ka pari ubos sa Salesians of Don Bosco nga naila usab sa tawag nga Society of St. Francis De Sales nga gitukod ni Saint John Bosco sa ulahing bahin sa 19th Century. – /EIM) (BANAT NEWS)
- Latest
