Bulahan ang Pilipinas itandi sa China-Cardinal Zen

CEBU, Philippines – Nakapatandog sa kasingkasing sa 12 mil ka mga delegado sa 51st International Eucharistic Congress ang testimoniya ni Hong Kong Archbishop Emeritus Zen Ze-kiun, S.D.B, nga miingong bulahan ang Pilipinas kung hisgotan ang kagawasan sa relihiyon kung itandi sa China.

Si Cardinal Zen kinsa gipriso niadtong 2014 sa kapolisan didto sa Hong Kong tungod sa pagbarog niini uban sa mga nagprotesta batok sa pagpanglutos sa Komunistang gobiyerno sa China, miingon, dili sayon ang pagsangyaw sa pagtuong Katoliko didto sa China.

Sumala pa ni Zen, sa pagkakaron padayon gihapon ang pagpanglutos sa mga komunista ngadto sa mga Katoliko maong niawhag siya sa katawhan nga iapil sa pag-ampo ang katawhan sa China.

Si Zen, nipadayag nga hangtod karon padayon siyang gipangita sa gobiyerno sa China tungod sa pagpanalipod niya sa Simbahang Katoliko.

Nasayran nga ang China estrikto kaayo batok sa bisan unsang mga relihiyon nga diin gidili ang pagbutang og simbolo sama sa krus sa mga simbahan sa Kristiyano ug ang pagtukod og mga mosque sa mga Muslim sa ilang nasud, kadtong masakpan, mag-atubang og bug-at nga kaso ug pagkabilanggo sa tanang miyembro sa mga pamilya.

Sa laing bahin, hugot nga seguridad ang gipatuman sa kapulisan sa mga sakyanan nga mosulod sa Pope John Paul Avenue ug sa pagsulod mismo sa pavilion diin makita ang tag-as nga linya sa security check  sa mga delegado diin dunay x-ray machine ug walk through metal detectors sa mga entrada.

Usa ka delegado gikan sa usa ka probinsya ang nasakmitan og gamay nga kutsilyo sa kapulisan diha sa Gate 3 sa IEC Pavilion. Hinuon sumala pa ni Inspector Irvin Labating, ang maong delegado nagpailang retiradong sundalo. Nabantayan kini human nakita sa scanner sa maong ganghaan, hinuon gikostudiya lamang ang hinagiban ug gikatakdang iuli human sa kalihukan.

Sa ikaduhang adlaw sa IEC, gisugdan kini ni Bishop Theodore Mascarenhas pinaagi sa usa ka pag-ampo ug gisundan og cultural presentation una pa ang labing unang catechesis ni Archbishop Miguel Vidarte may kalabutan sa tema sa kongreso "Christ in you our Hope of Glory."  Si Vidarte nihagit sa tanan pagsangyaw sa maayong pulong sa Ginoo ngadto sa uban.

Usa ka delegado gikan sa Canada nga si Rebecca Bokenfor mipadayag nga maanindot kaayo ilang pag-abot sa Sugbo tungod kay susama lang sila og dili mga langyaw tungod sa klase sa pagabi -abi kanila sa mga Sugbuanon.

Bisan pa man sa mga traffic advisories nga gipagawas sa Cebu City Transportation Office (CCTO) kalabot sa mga pangsirad-ang mga dalan aduna gihapoy mga motorista ang namugos sa pagsulod sa mga dalan nga gidid-an sila sa pagsud.

Ang Pope John Paul II Avenue gisirad-an gikan sa alas- 5 sa kaadlawon apan inay nga buksan og balik sa alas 9 sa buntag gilugwayan kini hangtud alas-10 sa buntag  kay daghan pang delegado ang wala mangabot.

Diha pa lang daan sa mga eskina padung sa maong dalan adunay gibutang nga mga barikada nga gibantayan og mga traffic enforcers ug polis.

Nasayran nga ang CCTO nanghatag og passes apan alang lang sa mga nagtrabaho ug nanimuyo duol sa IEC Pavilion.

Ang mga sakyanan gikan sa Mabolo padung sa Lahug adto paagion sa Cabantan ug kadtong gikan sa Lahug paingon sa Mabolo adto moagi sa  ilawom sa flyover sa Mindanao corner Archbishop Reyes Avenue.

Gisirad-an ang maong dalan padung sa IEC Pavilion nianang mga orasa tungod sa 120 ka mga bus nga maghatud kuha sa mga delegado. – /EIM) (BANAT NEWS)