PJ: Kaso ni Frasco gidali-dali ni Magpale
CEBU, Philippines – Gihulagway sa secretary-general sa One Cebu Party, kanhi kongresista Pablo John Garcia, nga nagdali si Bise Gobernador Agnes Magpale nga masuspenso si Liloan Mayor Vincent Franco “Duke” Frasco.
Kini human niluwat og kamanduan si Magpale kang Frasco sa pagtubag sa reklamo ni Bise Mayor Lucelito Pilapil nga wala niagi sa Provincial Board nga maoy modeterminar kung ipadayon o ibasura ba ang kaso.
Niadtong Disyembre 3, 2015 gisang-at ni Pilapil sa PB ang reklamo’ng grave abuse of authority labot sa paggasto sa pundo sa scholarship program.
Ug pagkasunod adlaw Disyembre 4, 2015 nimando dayun si Magpale kang Frasco sa pagtubag sa reklamo.
Niadtong Disyembre 7, 2015 gitugyan sa PB ngadto sa Committee on Complaints and Investigation aron tun-an ang kaso.
Nakapangutana si Garcia kung ngano’ng gipatubag ni Magpale si Frasco sa reklamo nga tun-an pa man sa komitiba sa PB.
Matud ni Garcia nga pagpanapaw sa gahum sa PB ang gihimo ni Magpale.
Nagtuo si Garcia nga giapas ni Magpale ang Pebrero 9, 2016 nga gituohang pagsugod sa ban sa pagsuspenso og mga opisyal ug mga kawani sa gobiyerno bisan kini ni-epekto na sugod niadtong Enero 10, 2016 sa pagsugod sa election period. – /EIM) (BANAT NEWS)
- Latest
