300 mil ang mosimba

CEBU, Philippines – Tres siyentos porsiyento na nga andam ang Artsidiyosisis sa Sugbo sa 51st International Eucharistic Congress nga buksan karong adlawa sa Dakbayan sa Sugbo nga gipaabot hugopan sa kapin sa 300 mil ka mga magtutuo.

Sumala pa ni Monsignor Joseph Tan, tigpamaba sa artsidiyosisis sa pakighinabi sa Banat News, nabuhat na nila ang tanang angay nga buhatunon sa pag-host sa IEC.

Lakip sa motambong sa maong misa mao ang mga obispo, kaparian, mga layko ug ang mga delegado sa 51st IEC.

Pangulohan ang selebrasyon ni Papal Legate Cardinal Charles Maung Bo, S.D.B., Arsobispo sa Artsidiyosisis sa Yangon, sa nasud sa Myanmar.

Matud pa ni Tan nga sa kagamay sa artsidiyosisis nahimo nila kini tungod kay ila g’yud nga gitinuod ang ilang papel isip host sa maong kalihokan.

“We are 300% ready, meaning wala nay kinahanglan nato nga buhaton nga in conscience nga mabasol nga kuwang ta  sa pangandam…sa kagamay sa atong archdiocese…I mean all honesty dili sa pagpanghambog..We really took it seriously,” sumala pa ni Tan.

Matud pa ni Tan nga sa pagbukas sa kalihokan sa IEC karong hapon iyang gipaabot nga hugopan ang Santos nga Misa sa Plaza Independencia sa alas-4 sa magtutuo nga di mominus sa 300 mil.

Iyang gipaabot nga mapuno ang Plaza Independecia ug ang mga dalan nga nagpalibot niini. Ang iya lang hangyo sa mga Sugboanon nga i-ampo ang maong kalihokan aron mamahimong malampuson kini.

Iya sang gihangyo ang Sugboanon nga mopakita sa iyang pagka maabi-abihon pinaagi sa pagpahiyom ngadto sa mga delegado. – /EIM) (BANAT NEWS)