Protesta sa mga SSS pensioners sa Enero 28

CEBU, Philippines – Gikatakda karong Enero 28 ang nationwide protest batok sa pag-veto ni Presidente Benigno Aquino III sa P2,000 nga usbaw sa pension sa Social Security System (SSS).

Matud ni Bayan Muna Partylist Representative Neri Colmenares kinsa modagan sa pagka-Senador nga nagtinguha gyud sila nga ma-override ang pag-veto ni Aquino sa mao’ng usbaw.

Atol sa pagbisita ni Colmenares sa Sugbo, kini nibutyag nga nagpadayon ang black Friday protest nga gipahigayon matag Biyernes ug giawhag usab niini ang publiko nga magsul-ob og itom nga arm band ug itom nga ribbon agi'g protesta.

Matud ni Colmenares nga gawas sa black Friday protest ug sa nationwide protest, laing protesta usab ang pagahimuon sa Enero 30 sa Quezon City Circle.

Usa ka signature campaign ang himuon isip resolusyon sa pag-override sa veto sa Presidente.

Kini unya ang labing unang higayon sa kasaysayan sa Pilipinas nga usa ka resolusyon ang pinaagi sa mga pirma agi'g pagsupak sa gi-veto sa Presidente.

Si Senador Grace Poe ug Chiz Escudero sa ilang bahin nipadayag usab sa ilang kasagmuyo sa gihimo sa Presidente human nga mayoriya sa Kongreso ug Senado nibotar nga pabor niini.

Matud ni Poe nga kinahanglan nga aduna'y laing kapilian o kaha paubsan ba ang P2,000 kun dili kini makaya sa budget.

Si Escudero nibutyag nga sa kasaysayan sa nasud, ang kasamtangang administrasyon mao ang aduna'y labing daghang veto nga balaudnon nga niabot na og 70.

Gianugnan usab si Escudero tungod kay nigasto ang Kongreso sa pagpasar sa balaudnon apan yano ra nga gi-veto ni Aquino.

Matud ni Colmenares nga kadtong mga senior citizens nga interesado, ila’ng adtuon ang ilang mga kongresista aron papirmahon sa resolution to override ilabi na nga gikinahanglan nila ang 194 ka pirma.

Niabot sa 211 ang nibotar alang sa pension hike bill sa Kongreso samtang 15 ka senador ang nibotar pabor niini. – /GMR) (BANAT NEWS)