CBCP Plenary una pa sa Sugbo

CEBU, Philippines – Nagkatapok ang 131 ka mga aktibo lakip ang 37 ka mga retiradong Obispo sa nasud  alang sa pagbukas sa ika -112 nga Catholic Bishops Conference of the Philippines Plenary Assembly kagahapon sa buntag nga gisugdan pinaagi sa usa ka Santos nga Misa sulod sa Cebu Metropolitan Cathedral.

Mao kini ang unang higayon sukad pa niadtong 1945 nga ang CBCP Plenary Assembly gihimo sa gawas sa Luzon.  Dinhi kini gihimo tungod kay daghang mga Obispo ang speakers usab sa nagsingabot nga 51st International Eucharistic Congress sa sunod semana.

Gisugat ug giabi-abi sila ni Archbishop Jose Palma kinsa nipaambit sa kasaysayan sa Sugbo ug sa Simbahan.

Ang nangulo sa Santos nga Misa mao si Papal Nuncio Archbishop Guiseppe Pinto. Atol sa wali ni Pinto, iyang gipahimug-atan ang pagpaambit sa mga gasa ug talento tungod kay matud niya ang katawhan adunay tahas sa pagpaambit sa mga kalipay ug paglaum nga iyang natagamtam ngadto sa uban.

Giawhag ni Pinto, ang katawhan nga magmakanunayon ngadto kang Kristo ug isentro kini kanunay sa kinabuhi.  Gipahigayon usab sa tanang mga opisyal sa CBCP ang ilang Profession of Faith and Oath of Fidelity.

Matud pa ni Auxiliary Bishop Oscar Florencio, chairman ad hoc committee sa CBCP Plenary Assembly nga tukion sa mga obispo ang mga nagkadaiyang hisgutanan ug mga pagsuway nga giatubang karon sa Simbahang Katoliko.  – /EIM) (BANAT NEWS)