Online sellers pabayron og buhis

CEBU, Philippines - Giawhag karon ang publiko nga adunay mga transaksyon sama sa pagpamalit og galamiton nga batasanon gyud ang pagpangayo og resibo  bisan kadtong ilang gipamalit pinaagi sa online shopping.

Si Bokal Arleigh Sitoy nagkanayon nga nauso na karon ang online shopping kay wa kaayoy hasol sa mga konsumidor tungod kay dili na man sila molakaw aron moadto sa shopping malls.

Apan nasayran nga adunay mga online sellers nga hangtud karon wala pa ma-regulate sa gobiyerno maong wala sila masingil sa ilang buhis.

Nasuta usab nga mas barato ang gipamaligya online tungod kay wala man sila kolektahi og buhis, apan giingong alkanse niini ang mga negosyante nga dili online based ang pagpamaligya.

Ang ubang negosyante nga mga rehistrado sa Bureau of Internal Revenue (BIR) mapugos na lang usab og pahigayon og online selling aron lang mo-survive ang ilang negosyo sumala pa ni Sitoy.

Nabalaka siya nga maapektohan na unya ang interes sa katawhan tungod kay ang gobiyerno nagsalig man sa buhis nga maoy gamiton sa mga proyekto sama sa imprastraktura ug ubang serbisyo alang sa katawhan.

Tungod niini, ang hunta probinsiyal nangayo og tabang sa mga local government units nga bantayan ug mopatuman sa tax laws sa mga online shops ug online sellers nga nagbase sa ilang mga hurisdiksyon. Dugang niini, ang BIR giawhag nga mogama og 24-hour mobile phone hotlines nga maoy moatiman sa mga report o reklamo sa mga mamaligyaay kinsa dili moisyu og resibo nga nakarehistro sa BIR.  (BANAT NEWS)