Paghusay sa kaso ni Rama diha sa DILG nagkainitay
CEBU, Philippines – Mitumaw ang tensiyon sa unang adlaw sa hearing sa administrative complaint nga gipasaka ni Labangon Brgy. Captain Victor Buendia batok ni Cebu City Mayor Michael Rama diha sa opisina sa Department of Interior and Local Government-7 kagahapong adlawa.
Ang maong kaso maoy nakapasuspenso ni Rama og 60 ka adlaw human niya gipaguba ang median structure sa dalan sa barangay ni Buendia.
Si City Legal Officer Jerone Castillo, kinsa lead counsel ni Rama, gustong iparesolba una ni DILG hearing officer Isidro Barrios III ang duha ka mosyon nga ilang giduso sa miaging tuig ngadto sa Office of the President, diin gi-file ang kaso. Kini ang motion to dismiss ug ang urgent motion to resolve the motion to dismiss.
Apan si Atty. Benjamin Militar, lead counsel ni Buendia, miingon nga dili na angay tukion pa ang mosyon tungod aduna nay order ang Office of the President.
Matud ni Militar nga binalik lang ang mga argumento sa grupo sa mayor ug makalangay lang kini sa imbestigasyon.
Mipagawas og oral order si Barrios nga ipadayon gihapon ang preliminary conference hasta ang duha ka mosyon i-apil lang pagresolba.
Gusto usab sa kampo ni Buendia nga mo-inhibit ang taga City Legal Office pagdepensa ni Rama kay ang Labangon man unta ilang angay protektahan .
Ipadayon ang preliminary conference karong Huwebes aron ipresentar sa duha ka habig ang ilang mga testigo. – /EIM) (BANAT NEWS)
- Latest
