PNoy nitambong sa haya sa labor leader
CEBU, Philippines – Si Presidente Benigno Aquino III hilom nga niduaw sa haya ni ALU-TUCP founder Democrito Mendoza kagahapon diha sa Mariners Court kinsa iyang giisip nga tinuod nga labor leader ug usa ka ‘guerilla warrior.’
Nagpundo lang og 30 minutos si Aquino kauban si House Speaker Belmonte, Executive Secretary Rene Almendras ug Cebu Governor Hilario Davide III.
Nakig-estorya si Aquino sa mga nailo nga pamilya sa mitaliwang labor leader ug pagkahuman nagpahulagway kini kanila dayon mibiya dayon sa haya ug wala na magpa-interbyu sa media.
Kauban usab ni Aquino ang iyang PSG ug pipila lang ka Presidential Media Staff nga nibabag sa mga sakop sa media nga makahinabi ang pangulo kay kuno personal niya nga katuyoan ang pagduaw sa haya ug dili opisyal nga lakaw.
Si Trade Union Congress Party Partylist Rep. Raymond Mendoza miingon nga walay politika nga gihisgotan ang pangulo sa pagduaw sa haya sa iyang amahan.
"It was a personal visit, we did not discuss anything politics. He even told us that he once visited the house of papa sometime in 2010 campaign," matud pa niya kinsa ika- 14 sa anak sa nitaliwang labor leader.
Ang batan-ong Mendoza mao na karon ang acting president sa Trade Union Congress of the Philipines.
"President Aquino is happy with what happened to Cebu kay nakita nya ang growth sa Cebu like daghan na og mga auto ug BPOs," matud pa niini.
Gawas ni Aquino, si Vice President Jejomar Binay uban sa iyang mga senatorial bets Atty. Allan Monsanto ug Leyte Representative Martin Romualdez ang nakaduaw na sa haya.
Si Romualdez, mao ang bana ni Yedda Marie Mendoza Kittilstvdet-Romualdez, usa sa mga apo ni Democrito.
Ihatud sa kataposang pahulayan si Mendoza karong Enero 23 sa hapon didto sa ilang luna (Papa Kit's) sa Liloan.
"Request gyud na ni papa nga adto siya ilubong sa place where he was born.We have already complied with the requirements for him to be buried there," matud pa sa batan-ong Mendoza. – /EIM) (BANAT NEWS)
- Latest
