Seguridad sa mga bay-patigayon ipa-review
CEBU, Philippines - Ang kadagkoan sa kapolisan miingon nga angay’ng susihon ang mga security system sa mga financial ug business establishments sa dakbayan sa Lapu-Lapu aron malikayan ang mga krimen.
Si Lapu-Lapu City police director Armando Radoc miluwat sa maong pamahayag human nga usa ka pawnshop sa Barangay Pusok ang nabiktima sa pagpanulis kaniadtong Domingo sa udto.
Adunay mga 11,000 ka balay-patigayon ang narehistro sa business permit section sa Lapu-Lapu City Hall.
Padayon pa nga gisusi sa kapolisan ang pagpanulis diin lima ka tulisan ang nagpakaaron-ingnon nga auditing team sa maong pawnshop apan midala sa kuwarta ug mga alahas.
Base sa pasiuna nga imbestigasyon sa kapolisan nahibaw-an nga wala na mokuha og guwardiya ang pawnshop pipila ka adlaw sa wala pa mahitabo ang pagpanulis.
Ang tagdumala sa pawnshop wala pa usab mohatag og inpormasyon kun pila ang kantidad sa kuwarta ug alahas nga nakuha sa mga tulisan.
Matud ni Radoc nga gipaubos usab nila og imbestigasyon ang mga kawani sa pawnshop sa pamasin nga makakuha sila og ideya kun kinsa ang mga nanulis. (BANAT NEWS)
- Latest
