Ang deal sa Kapitolyo ug Con Equip ipabasura gyud
CEBU, Philippines - Si Atty. Winston Garcia miawhag sa mga sakop sa Hunta Probinsiyal sa Sugbo nga dili na dayonon pagpalit ang mga heavy equipment nga gustong paliton sa administrasyon ni Gobernador Hilario Davide III.
Matud ni Garcia nga ang pagbasura sa deal tali sa Kapitolyo ug Con-Equip makatabang pagwagtang sa mga pagduda nga adunay mga opisyal sa Kapitolyo ug ilang pamilya nga nakakwarta niini.
Si Provincial Board Member Sun Shimura maoy unang miawhag nga dili na ipadayon ang kontrata sa Kapitolyo ngadto sa Con Equip ug mohimo pag-usab og laing subasta kun mopalit man gyud ang Kapitolyo sa mao nga mga makinarya.
Sa session sa Provincial Board kaniadtong Lunes, wala hisgoti ang kontrobersyal nga Con–Equip Deal bisan pa man sa ka dinalian ug kamahinungdanon sa isyu nga pagpalit og China-made dump trucks nga nagkantidad og P250 milyones.
Sibaw ang mga tabi-tabi nga kun dili mahinayon ang deal sa Con-Equip ug Kapitolyo adunay mobulgar sa giingong may nakakuwarta ug nga nahatagan og P10 milyones aron lang maaprobahan ang proyekto. Malaumon si Garcia nga hangpon sa mga opisyal sa Kapitolyo ang iyang awhag pagbasura sa hingpit sa Con-Equip deal. (BANAT NEWS)
- Latest
