Mananaog may insentibo

CEBU, Philippines – Ang mga contingents sa mga lokal nga kagamhanan sa probinsiya kinsa nakadaog sa Sinulog Grand Parade giplanohan nga pahatagan og insentibo sa Kapitolyo kun itugot sa Hunta Probinsyal.

Si Gob. Hilario Davide III nagkanayon nga angayan pahalipayan ang maong mga contingents sa ilang pagkugi sa ilang pag-praktis ug mituman sa ilang mga panaad ngadto kang Sto. Niño.

Dugang ni Davide nga bisan unya ug ginagmay lang nga kantidad basta mahatagan lang og pahalipay ang maong mga partisipante.

Ang dakbayan sa Carcar napiling 2nd place sa Sinulog based category, 4th place ang Dakbayan sa Danao, 5th place ang Lungsod sa Tuburan.

Sa best in musicality, ang lungsod sa Tuburan napiling 3rd place ug 5th place ang Carcar City Division ug napili usab kining 4th place sa Street Dancing. Ang Pundok sa Kabataang Mananayaw sa Dakbayan sa Danao ug Looc Norte National High School sa lungsod sa Asturias  ang nadeklarang grand winners sa Sinulog sa Kabataan sa Lalawigan.

Sa laing bahin, si Davide mibutyag nga ang probinsiya mohatag og P3 milyones nga hinabang ngadto sa Sinulog Foundation niining tuiga.

Dugang ni Davide nga ang provincial budget officer adunay budget alang sa donasyon para sa SFI. – /EIM) (BANAT NEWS)