Angay panggaon ang mga bata–Palma
CEBU, Philippines - Si Cebu Archbishop Jose Palma mipasumbingay kabahin sa birth control sa iyang sobra sa 20 ka minutos nga homiliya sa Misa pontipikal kagahapon sa buntag kay ang pista ni Senyor Sto. Niño pista usab sa tanang kabataan.
Gibalik-lantaw ni Palma ang nahitabong debate kabahin sa Reproductive Health Bill nga nahimo na karong hingpit nga balaod bisan sa gihingusgang kampanya sa pro-life advocates ilabi na sa kaparian.
Ang maong balaod nakapabahin-bahin sa mayoriyang Romano Katoliko sa nasud.
Matud niya, usa sa init kaayo nga argumento ang kabahin sa nagkadakong populasyon sa nasud ug kun ang usa ka bata nga madugang sa pamilya makapalisod ba gyud tinuod sa usa ka pamilya.
Sumala pa niya, nga didto gani sa China nakaamgo ang ilang gobiyerno nga maapektahan diay gyud ilang ekonomiya kun magpadayon ang ilang One Child Policy mao nga gitugot na karon ang pagdugang og mga anak.
Si Palma nagkanayon nga daghang mga bata ang wala makadawat og gugma nga angayan unta nilang madawat.
“There are many children who have not receive the love they ought to receive,” matud pa niya.
Kini maoy hinungdan nga sa umaabot nga International Eucharistic Congress daghang mga batang libud-suroy ang ilang paapilon sa First Communion.
“The feast of the Santo Niño is a reminder that we should care for children,” pahinumdum sa arsobispo.
Si Palma nagkanayon nga ang tema sa Pista Senyor nga “Senior Santo Niño Tinubdan sa Kaluoy ug Pagkamapu-angoron” karong tuiga haom sa deklarasyon sa Santo Papa nga mao ang “Jubilee Year of Mercy.” - /EIM (BANAT NEWS)
- Latest
