8 bata nawala atol sa Sinulog

CEBU, Philippines - Walo ka bata ang natala sa kapolisan sa Dakbayan sa Sugbo nga nawala human nabuwag sa ila’ng mga ginikanan gumikan sa pagdinuotay sa mga tawo atol sa Sinulog 2016.

Sa Waterfront Police Station, upat ka gagmay nga bata ang gihatud sa mga nakakita nga nagsige og hilak.

Sumala pa ni Senior Police Officer 4 Blas Ejoc, desk officer sa Waterfront Police Station, nga human sa pipila ka oras nakuha ra usab sa ila’ng mga ginikanan.

Gikataho’ng nagduwa-duwa ang mga bata sa Plaza Independencia.

Ang mga bata wala’y name tag apan swerte kay nidumdum lang usab dayon sa buhatan sa kapolisan ang ila’ng mga ginikanan aron sila makuha.

Sa Fuente Police Station upat usab ka bata ang natala nga nawala.

Apan tulo niini nag-edad na og 11 ug 12-anyos nga mag-agaw nga niduol sa ila’ng buhatan aron magpatabang nga mahatud sa ila’ng gipuy-an.

Sumala pa ni Police Officer 3 Clifton Manogora, desk officer sa Fuente Police Station, nga nagpakitabang sa ila’ng buhatan ang tulo ka mag-agaw nga pulos taga Labangon kay mahadlok sila nga mouli gumikan sa kadaghang tawo ug basin madasmagan.

Si Manogora niingon nga ila lang usab ihatud ang mga bata sa ila’ng balay pagseguro nga wala’y dautang mahitabo sa tulo kay kini nagpatabang man kanila.

Sa kinatibuk-an, una na’ng gitug-an ni Chief Supt. Manuel Gaerlan nga hapsay ug nahimo’ng nagmalampuson ang Sinulog karong tuiga human wala’y mga dagku’ng kakulian ang natala.  - /GMR (BANAT NEWS)