Dancer sa placer mosayaw bisan namatya’g mama

CEBU, Philippines – Samtang nagmalipayon ang ubang contingents sa pagsalmot sa Sinulog Grand Parade, usa ka 13 anyos nga Sinulog dancer ang gibati karon og kaguol human niya mahibaw-i nga namatay ang iyahang inahan niadtong Huwebes.

Si Kyrstal, (nihangyo nga dili magpaila sa iyang apelyedo), miyembro sa Tribu Himag-ulaw, Placer, Masbate nga niapil sa free interpretation category.

Siya mibutyag nga grabe ang iyang kasubo sa pagpanaw sa iyang inahan tungod sa throat cancer, apan mosayaw gyud siya para sa iyang mama nga dugay nang nangandoy nga makita siyang makaapil sa Sinulog Grand Parade.

“Naguol kaayo ko kay wala na si Mama, ganahan unta ko motan-aw siya nako ron bisag sa TV unya namatay diay si Mama,”matud pa ni Krystal.

Ang 13-anyos nga mananayaw miingon nga mao kini ang pinakaunang higayon nga nisalmot siya sa Sinulog Grand Parade ug wala niya damha nga mao ni ang unang Sinulog nga dili na niya makit-an ang iyahang inahan.

“Excited unta kaayo ko karong Sinulog kay at last, makasayaw nako pero namatay diay si Mama maong akong gibati karon kay dili ma-explain,” matud pa ni Krystal nga emosyonal nga nitubag sa mga pangutana sa Banat News.

Si Krystal miingon nga wala siya’y plano moundang sa pagsayaw kay usa ka deboto ang iyahang inahan kang Senyor Sto. Niño ug nagtuo siyang maguol gyud ang iyang inahan kung dili kini mopadayon sa pagsalmot sa Sinulog Grand Parade.

“Kung mohunong ko, kahibaw ko nga maguol si mama kay iyaha man ning pangandoy para sa akoa nga mosayaw para ni Senyor Sto. Niño, bisag sakit sa dughan mosayaw ko para niya ug ako na lang pud iampo si Mama samtang naa ko diri sa Cebu mosayaw para ni Senior Sto. Niño,” saysay pa ni Krystal.

Si Barry Luche, choreographer sa Tribu Himag-ulaw sulod sa pito ka tuig niingon nga naguol siya sa kahimtang sa bata apan nibilib siya sa dihang miingon kini kaniya nga mopadayon siya sa pagsayaw karong adlawa.

“Giingnan na nako siya nga mopauli na lang sa ila, okay raman nako kay maguol gyud ko makakita niya during practices nga magul-anon kaayo ug mohilak  unya siya miingon nga dili ko mouli sir, ipadayon ko ni. Mao nga nalipay intawon ko,” matud pa ni  Luche. – /EIM) (BANAT NEWS)