Fernandez di pa motuman sa suspension

CEBU, Philippines – Nagdumili si Konsehal Socrates Fernandez sa Dakbayan sa Talisay sa pagtuman sa 90 ka adlaw nga suspension order nga gipagawas sa Ombudsman sa rason nga siya nakaduso pa og motion for reconsideration.

Sa miaging semana, hingpit nang gipatuman sa Department of Interior and Local Government ang 90 ka adlaw nga suspension order sa konsehal may kalabotan sa kaso dihang pugsanon niyang gikuha ang usa ka bag sud sa sakyanan sa kontrobersiyal niyang sinagop nga si Joavan Fernandez niadtong Hunyo 2010.

Ang maong sakyanan lakip na ang mga anaa sa sud niini giisip unta sa kapolisan nga ebidensya batok sa iyang anak kinsa niadtong tungora gireklamong nanion og armas sa usa ka nurse.

Siya pa maoy mayor sa dakbayan dihang kini nahitabo hinungdan nga gipasakaan siya og kaso sa kapolisan og  paglapas sa Presidential Decree 1829 (Obstruction of Justice), violation of Republic Act 6713 (Code of Conduct and Ethical Standards for Public Officials and Employees) ug Grave Misconduct and Abuse of Authority. Ang suspension order kang Fernandez gipirmahan ni Ombudsman Conchita Carpio Morales. Apan nasayran si Konsehal Fernandez miduso og motion for reconsideration pinaagi sa iyang abogado nga si Atty. George Bragat. Matud niya nga iya lang unang paabuton ang desisyon sa Ombudsman sa ilang motion. Apan si Bise Mayor Romeo Villarante miingon nga ikonsulta niya kini sa Department of Interior and Local Government (DILG) ug sa Ombudsman sanglit nabalaka kini nga sila’y makuwestiyon kun di motahod sa suspension order si Fernandez. – /EIM) (BANAT NEWS)