Nagsuyop nabulabog sa armadong tawo

CEBU, Philippines – Nabulabog ang mga nag-pot session diha’ng gitubag sa kapolisan ang alarma sa armadong tawo  apan niresulta na hinuon sa pagkasikop sa unom ka lalaki sa Sitio Hawod, Bulacao, Siyudad sa Talisay niadtong Huwebes sa udto.

Ang mga nasikop mao sila si Jonathan Ramirez, 32, taga Holy Child, Tabunok; Teodoro Pardillo, 36, ulitawo ug Rey Deiparine, 38, minyo, pulos taga Mananga 2, Tabunok; Joven Novela, 36, minyo; Rolando Abalo, 29, minyo; Reynaldo Albeos, 53, ulitawo, pulos taga Ilang-Ilang, Barangay Lagtang.

Matud ni SPO1 Mikie Espina sa Talisay City Police Station nga adunay nitawag kanila nga concerned citizen ug nipahibawo nga adunay armado’ng tawo sa ila’ng lugar.

Sila si Espina ug kaubanan ang dali nga nitubag sa alarma kuyog ang mga sakop sa Special Weapon and Tactics (SWAT).

Pag-abot sa nahisgutang lugar, nagkaratil og panagan ang mga tawo lakip na ang armado’ng tawo.

Apan ang mga awtoridad nakakita sa grupo sa mga suspek nga nag-iyahay pa og hingos sa ginadiling drugas.

Pipila sa mga dinakpan ang sabog na apan ang uban nakuwangan gumikan sa pag-abot sa kapolisan.

Nakuha gikan sa mga suspek ang tulo ka linukot nga tin foil nga gihimo’ng tooter, tulo ka foil nga gihimo’ng sandayong, duha ka lighters ug mga linukot nga tissue.

Gitanggong na ang mga dinakpan ug gikatakda nga pasakaan og kaso.

Samtang usa ka level 3 drug pusher sa Lungsod sa Minglanilla ang nasikop sa iya’ng panimaye sa Lower Lipata, Barangay Linao kagahapon sa buntag.

Ang nadakpan mao si Edwin Tantano, 46-anyos.

Si Chief Insp. Franco Oriol, hepe sa kapolisan sa lungsod, niingon nga si Tantano mismo ang nangunay sa pagtunol sa shabu ngadto sa poseur buyer sa kantidad nga P200.

Dali nga girumbo sa kapolisan si Tantano ug nakuha ang usa ka gamay nga pakete sa shabu ug daku nga putos nga moabot sa 5.4 gramos nga mokantidad og P59,472.

Matud ni Oriol nga gikan sa Siyudad sa Sugbo ang drugas nga gibaligya ni Tantano ug siya makahalin og 50 ngadto sa 100 gramos matag semana. Ang pagpamaligya giingong moabot sa mga barangay Linao, Pakigne, Calajoan ug uban pa’ng barangay sa Minglanilla.

Gitanggong na si Tantano samtang nagpaabot nga pasakaan og kaso.

Sa laing operasyon, nasakmit sa kapolisan ang mokabat sa P50, 000 nga shabu ug kahimanan sa paggamit gikan sa usa ka pusher nga babaye sa pagronda sa panimalay niini sa Sitio Camalig Bato, Barangay Tabok, Dakbayan sa Danao ala una pasado sa niagi’ng kadlawon.

Si Police Officer 3 Arnold Labine sa Danao City Police Station niila sa nadakpan nga si Nimfa Bintoy dela Rama, hingkod ug minyo.

Matud ni Labine nga nakakuha sila og search warrant nga giluwatan ni Judge Gerry Dicdican sa Branch 25 sa Regional Trial Court (RTC) 7.

Dugang ni Labine nga diha’ng ila’ng gihimo ang pagsiksik sa panimalay sa dinakpan, ila’ng nakuha ang usa ka daku’ng pakete sa shabu ug duha ka gagmay nga putos niini.

Nakuha usab ang salapi’ng cash nga nagkantidad og P1,900 nga gituohang halin uban sa mga drug paraphernalia. (Gabriel C. Bonjoc ug Romeo T. Limpangog/GMR)(BANAT NEWS)