Guwardiya wa relibohi nanion og polis sikop

CEBU, Philippines - Kasong grave threats ug paghupot og ilegal nga armas ang giatubang sa usa ka guwardiya human kini nanion sa usa ka pulis diha sa Plaza Independencia sa Dakbayan sa Sugbo niadtong nakalabay nga gabii.

Ang guwardiya giila nga si Generoso Estacio Jr., 25, sakop sa GDS Security Agency nga taga Dakbayan sa Talisay, samtang ang mireklamo nga pulis mao si Police Officer 1 Darryl Mabano nga nadestino sa Cebu City Public Safety Company.

Matud pa ni Police Officer 3 Antonio Asoy, desk officer sa Waterfront Police nga nahinabi sa Banat News nga nahimo sa guwardiya ang pagpanion og armas human kini gisapot kay tulo na ka adlaw nga wala na relibohan sa iyang pwesto.

Ang pulis nga sakay sa iyang motorsiklo kauban ang iyang kapuyo sa maong dapit ang kalit lang nga gisita sa suspek ug gitionan gamit ang .38 revolver.

Si Mabano na usab ang miaresto sa guwardiya ug gidala sa Waterfront Police Station. Sa pagsubay sa kapulisan ila usab nga nahibaw-an nga wala’y lisensya ang armas sa guwardiya.

Gipasakaan na kagahapong adlawa og kaso si Estacio nga naglakip sa posibleng pagsang-at og paglapas sa Comelec gun ban.  (BANAT NEWS)