Anti-drug program sa mga magtutudlo hingusgan
CEBU, Philippines - Tukion sa Cebu Provincial Anti-Drug Abuse Commission, Department of Health ug Department of Education ang pagpahigayon sa drug test sa mga magtutudlo.
Kini human adunay mga magtutudlo nga nalambigit sa ginadili’ng drugas ug gani aduna na’y nadakpan.
Si Joey Herrera, hepe sa CPADAC, nibutyag karong Martes ang director sa DOH-7 nga si Dr. Jaime Bernadas ang magpadala og team sa Kapitolyo aron tukion ang community base after care program diin ila’ng imbitahon ang DepEd. Kabahin sa programa ang paghatag og counseling sa mga magpositibo sa drug test ug pag-assess kung angay ba ipaubos sa rehabilitasyon o dili.
Si Herrera nagkanayon nga kung mapatuman ang mao’ng programa, kini ang tubag sa problema sa DepEd kung may magtutudlo nga magpositibo sa drug test.
Si DepEd Secretary Armin Luistro niawhag sa katawhan sa pag-report kung may masayran nga magtutudlo nga malambigit sa ilegal nga drugas.
Matud ni Luistro nga hugot sila’ng nakig-alayon sa kapolisan ug Philippine Drug Enforcement Agency sa pagpatuman sa surprise drug testing sa mga empleyado sa ahensiya ug sa mga magtutudlo.
Ang regional director sa DepEd-7, Dr. Juliet Jeruta, nipahimangno usab sa mga magtutudlo nga dili malambigit sa ilegal tungod kay sila ang gitahasan isip custodian ug stewards sa kabataan.
"Mahimo ra sila’ng mangita og panginabuhian basta sa legal lang nga pamaagi ug dili sa illegal," matud ni Jeruta.
Bag-o lang nga usa ka magtutudlo kuyog sa iya’ng pamilya sa San Francisco, Camotes ang nasikop gumikan sa pagkalambigit sa pagpamaligya sa ilegal nga drugas. (BANAT NEWS)
- Latest
